Тошкентни Фарғона водийси билан боғловчи Қамчиқ довонида ўрнатилган калиш инсталляцияси ижтимоий тармоқларда қизғин муҳокамаларни келтириб чиқарди. Кескин танқидлар туфайли уч кундан сўнг калиш инсталляцияси олиб ташланди. Натижада тармоқлардаги баҳс-мунозаралар янада авж олди. «Дарё» мухбири Миролим Исажонов мазкур ҳолатга ойдинлик киритиш мақсадида журналистик суриштируви ўтказди.
«Лойиҳага 150 миллион сўм маблағ сарфланган»
Суриштирув давомида маълум бўлишича, калиш инсталляцияси 16 йилдан буён Қўқон шаҳрида фаолият юритиб келаётган 2f technology group МЧЖ раҳбарияти ташаббуси билан ўрнатилган.
Корхонамиз 2004 йилда очилган. Биз оёқ кийимлардан ташқари, резина маҳсулотлари ҳам ишлаб чиқарамиз. ‘Жайрон’ бренди остидаги калишларимиз бир қанча давлатларга экспорт қилинади. Қамчиқ довонида амалга оширилган лойиҳа ташаббускори ўзимиз бўламиз. Янги юмшоқ калиш брендини тасдиқлатганимиздан сўнг уни замонавий маркетинг усулида халққа етказмоқчи бўлдик ва Қамчиқ довонига калиш ҳайкалини ўрнатишга қарор қилдик. Лойиҳага қўл уришдан олдин Поп тумани ҳокимининг фармойиши билан бизга жой ажратилган, ҳокимиятдагилар ҳам инсталляция ўрнатишимиздан хабардор бўлишган. Лойиҳа харажатларига, аниқроғи, реклама компаниясининг хизматлари, калиш макетини яратиш, унинг тагига қуйилган бетонлар ва кафеллар, ёнадиган ёзувлар учун жами 150—155 миллион сўм атрофида маблағ сарфлаганмиз.Аюбхон Яҳёев, 2f technology group МЧЖ директори
«Макетнинг қаердалигини билмаймиз»
Тадбиркорнинг айтишича, у калиш инсталляциясининг қисқа вақт ичида машҳурликка эришишини олдиндан билган, аммо тармоқларда кескин танқидга учрашини тасаввур қилмаган.
Лойиҳамиз бир неча ой давомида якунига етди. Ўзбекистонда шу пайтгача учрамаган лойиҳани қилаётганимиз учун шов-шув бўлишини аввалдан билгандик. Лекин кўплаб одамларнинг ‘Калишга ҳайкал ўрнатибди’, дея негатив фикрлар билдиришини кутмагандик. Анчадан буён маҳсулотларимизни бир қанча журналларда реклама қилиб келамиз. Аммо рекламанинг бундай вариантига биринчи марта қўл ургандик. Шу орқали одамларнинг эътиборини қаратиб, савдо-сотиқни кучайтирамиз, деган ниятда эдик.Калиш ‘ҳайкали’ интернетда машҳур бўлгач, бир неча кундан кейин Наманган вилояти ҳокимининг қурилиш ишлари бўйича ўринбосари Саидаҳмад Султонов келиб, ‘Буни олиб ташлаймиз, интернетда муҳокама бўляпти. Ўзингизни Қўқонингизга ўрнатинг, Наманган вилоятининг шаънига гап тегяпти. Шунингдек, бу миллийлигимизга тўғри келмайди’, деди. Биз эса унинг бу фикрларига қарши чиқиб, макетни ҳеч қаерга олмаслигимизни айтдик. Аммо ярим кечаси келиб қарасак, калишни таг-туги билан йиғиштириб, олиб ташлашибди. Ҳозир у макет қаерда ва қандай аҳволда эканлигини аниқ билмаймиз. Ижтимоий тармоқларда ёзилаётганидек, макетни биз бузганимиз йўқ. Ушбу масалада ёрдам сўраб, Савдо-саноат палатасига мурожаат қилганмиз. Айни пайтда уларнинг жавобини кутяпмиз.
Аюбхон Яҳёев, 2f technology group МЧЖ директори
«Тадбиркор фармойиш мажбуриятларини бажармаган»
Шундан сўнг Наманган вилояти ҳокимининг қурилиш ишлари бўйича ўринбосари Саидаҳмад Султонов билан боғланиб, унинг ҳам фикрларига қизиқдик.
Ҳақиқатан бу бўйича Поп тумани ҳокимининг фармойиши чиқарилган. Аммо тадбиркор калиш макетини эмас, балки калиш расми акс этган 3*6 ўлчамли баннер ўрнатиши лозим эди. Бу фармойишда белгилаб қўйилган. Шунингдек, унинг кўриниши ва ўрнатиладиган жойини туман архитектураси ҳамда қурилиш бўлими билан маслаҳатлашиши керак эди. Бу ҳужжатнинг 3-бандида мажбурият сифатида қайд этилган. Бундан ташқари, инсталляция А-373 халқаро йўл ёқасида жойлашганлиги туфайли туризм қўмитаси, ‘Тасвирий ойина’дан идеологияси бўйича рухсат олиши лозим эди. Лекин тадбиркор буларни бажармаган.3—4 кун аввал калиш инсталляциясига бориб, тадбиркор билан юқоридаги талаблар ҳақида суҳбатлашдик. У ‘Макет менинг брендим’, деган фикрни айтди. Мен эса мажбуриятларни бажаришини, макетни хусусий корхонаси олдига ҳам ўрнатиши мумкинлигини айтдим. Тадбиркор калиш қаерда эканлигини Поп тумани ҳокимлиги вакилларидан сўраса, улар аниқ айтиб беришади. Назаримда, макетнинг қаердалигини тадбиркорнинг ўзи ҳам яхши билади. Аммо мен бу ҳақда маълумотга эга эмасман. Тадбиркор фармойишдаги мажбуриятларини бажарсин, унга ҳеч қандай тўсқинлик ҳам, муаммо ҳам йўқ, макетни яна қайта ўрнатиб қўяверади. Буни унинг ўзига ҳам айтганмиз.
Саидаҳмад Султонов, Наманган вилояти ҳокимининг қурилиш ишлари бўйича ўринбосари
Изоҳ (0)