Ўзбекистонда инсон ҳуқуқлари ва эркинликлари ҳимояси, қонун устуворлигини таъминлашга қаратилган ислоҳотлар давом эттирилади. Бу ҳақда Шавкат Мирзиёев 29 декабрь куни Олий Мажлисга йўллаган Мурожаатномасида таъкидлаб ўтди.
Жумладан, Президентнинг таъкидлашича, янги йилдан бошлаб жорий этиладиган «бир суд—бир инстанция» тамойили суд қарорларининг адолатли, қонуний ва барқарорлигини таъминлашда бош мезон бўлиши лозим.
Ҳозирги кунда вилоят судлари чиқарган қарор устидан берилган шикоятлар шу судларнинг ўзида кўриб чиқилади. Биргина 2019 йилда вилоят судлари қабул қилган 13 мингга яқин шундай қарорлар Олий суд томонидан ўзгартирилган ва бекор қилинган.
«Келгуси йилдан бошлаб бир-бирини такрорлайдиган суд босқичлари қисқартирилади. Одил судловга хос бўлмаган ишларни назорат тартибида кўриш амалиёти бекор қилинади», — деди давлат раҳбари.
Янги йилдан бошлаб фуқаролик, иқтисодий ва жиноят ишлари бўйича вилоят даражасидаги 3 та суд 1 та суд сифатида бирлаштирилади. Суд муҳокамасига қадар судда ишларни дастлабки эшитиш амалиёти янги тартиб сифатида жорий этилади. Бунда ишни тўхтатиш ёки тугатишга асос етарли бўлса, суд ишни аввалгидай тергов ёки прокурорга қайтармасдан, ўзининг якуний қарорини қабул қилади.
Бундан ташқари, Шавкат Мирзиёев жазони ижро этиш тизимида инсонпарварлик тамойилини кенг қўллаш борасидаги ишлар давом эттирилишини маълум қилди. Хусусан, халқаро стандартлардан келиб чиқиб 25 та манзил-колониялар босқичма-босқич қисқартирилади.
«Бундан буён биринчи марта озодликдан маҳрум этилган шахсга берилган жазо енгилроғи билан алмаштирилса, у манзил колонияга ўтказилмасдан, пробация назоратига олинади. Мазкур енгиллик асосида ҳозирги кунда жазо муддатини ўтаётган 6 минг нафар шахсга ўз маҳалласи назорати остида оиласи бағрида бўлиш имкони яратилади», — деган у.
Президент тезкор қидирув фаолиятида, тергов органлари ва жазони ижро этишда қийноқларнинг олдини олиш тизимини тубдан қайта кўриб чиқиш зарурлигини таъкидлади.
Изоҳ (0)