Президент Шавкат Мирзиёев 29 декабрь куни Олий Мажлисга йўллаган Мурожаатномаси давомида 2021 йилда ишга тушириладиган бир қатор лойиҳалар ҳақида маълумот берди.
Жумладан, кейинги йилда иккита тезюрар поезд ҳаракати йўлга қўйилади, «Бухоро—Урганч—Хива» темир йўлини электрлаштириш бошланади.
Аҳоли пунктлари ўртасидаги, айниқса, қишлоқларни туманлар марказлари билан боғлайдиган узлуксиз автобус қатновлари хусусий секторни жалб қилиш орқали кўпайтирилади.
Тошкент шаҳрида ерусти метросининг 12 километрлик иккинчи босқичи фойдаланишга топширилади. Шу тариқа ерости ва ерусти метро линиялари яхлит тизим сифатида бир-бирига уланади.
Президентнинг сўзларига кўра, Ўзбекистон туризмни ривожлантириш бўйича изчил ислоҳотларни 2021 йилда ҳам давом эттиради. Зиёрат туризми ва ички туризмни ривожлантиришга алоҳида эътибор берилади.
Шунингдек, туризм объектлари атрофидаги ер майдонлари, сув ва йўл инфратузилмаларини яхшилаш учун бюджетдан 1 триллион сўм ажратилади.
«Ҳудудларнинг ривожланиши учун муҳим омиллардан бири — уларнинг ўртасида транспорт алоқасини таъминлаш. Қисқа қилиб айтганда, барча аҳоли пунктларидан пойтахтимизга, энг йирик шаҳарлар ва туристик марказларга тезда келиб-кетиш имкониятини берадиган ўзаро боғланган транспорт тармоғини яратишимиз лозим», — деди Президент.Шу мақсадда, ҳукуматга 2021 йил 1 мартдан бошлаб, ички туризм йўналишларидаги авиақатновларни йўлга қўйиш ва авиачипта нархининг бир қисмини бюджетдан қоплаб бериш тизимини жорий этиш вазифаси юкланди.
Шунингдек, бир қатор ҳудудий аэропортлар давлат-хусусий шериклик асосида ташқи бошқарувга берилади.
Мавзуга доир:
- «ЖСТга кириш ҳамда Евроиттифоқ билан ҳамкорлик бўйича ишларни фаоллаштириш лозим» — Шавкат Мирзиёев
- Шавкат Мирзиёев: «Давлат иштирокидаги корхоналар давлатнинг ўзига оғир юк бўляпти»
- Ўзбекистонда электр энергияси улгуржи бозори шакллантирилади, суюлтирилган газ импорти учун божлар бекор қилинади
- Шавкат Мирзиёев 2021 йилни Ёшларни қўллаб-қувватлаш ва аҳоли саломатлигини мустаҳкамлаш йили деб эълон қилди
Изоҳ (0)