Навоийда ўзаро тил бириктириб, ўз маҳалладошининг чорва молларини ўғирлаб кетган уч нафар шахс ушланди, дея хабар бермоқда ИИВ.
Маълум қилинишича, 2020 йил 10 декабрдан 11 декабрь кунига ўтар кечаси 1990 йилда туғилган, Навбаҳор тумани, «Уч тут» маҳалла фуқаролари йиғинида яшовчи, муқаддам судланмаган, якка тартибдаги тадбиркорлар К.Э., 1997 йилда туғилган Ж.А. ҳамда 1993 йилда туғилган Р.И. ўзгалар мол-мулкини яширин равишда қўлга киритиш мақсадида ўзаро жиноий тил бириктирган.
Улар ўша кеча 1964 йилда туғилган Навбаҳор тумани «Уч тут» МФЙ фуқароси Навоий шаҳридаги «Шавкат сервис» МЧЖ ишчиси П.О.га тегишли бўлган молхонадан бозор нархи 600 минг сўмлик бўлган бир бош эчкини ҳамда 1955 йилда туғилган, Навбаҳор тумани «Уч тут» МФЙда яшовчи, нафақахўр У.О.га тегишли бўлган молхонадан бозор нархи 3 миллион сўмлик икки бош майда шохли молларини ўғирлаб кетгани аниқланган.
Мазкур ҳолат юзасидан К.Э., Ж.А., ҳамда Р.И.га нисбатан Жиноят кодексининг 169-моддаси 2-қисми (бир гуруҳ шахслар томонидан олдиндан тил бириктириб амалга оширилган ўғрилик) билан жиноят иши қўзғатилиб, ҳозирда тергов ҳаракатлари олиб борилмоқда.
Аввалроқ Қоракўл халқаро математика мактабининг қурилиш-таъмирлаш ишларидаги ўғрилик фош этилгани, Андижонда 3 нафар мактаб ўқувчисини алдаб, уларнинг зирагини ечиб олган аёл ушлангани ҳамда Наманганда 15 ёшли бола дўкондан 16 та телефон ўғирлагани ҳақида хабар берилганди.
Изоҳ (0)