Ўзбекистонда билим етишмаслиги барча соҳаларда сезилмоқда ва бу «бугунги кунда ишимиздаги энг катта камчиликдир». Бу ҳақда Президент Шавкат Мирзиёев 29 декабрь куни Олий Мажлисга йўллаган Мурожаатномасида айтиб ўтди.
«Ҳолбуки, бирорта ҳудудни ҳам, тармоқни ҳам, замонавий илм ва билимларсиз ривожлантириб бўлмайди. Тараққий этган мамлакатларда ялпи ички маҳсулотнинг 50 фоизидан ортиғи ‘билимлар иқтисодиёти’ ҳисобидан, яъни инновациялар ва юқори малакали кадрлар томонидан яратилаётгани буни яққол исботламоқда», — деди давлат раҳбари.
Маълум қилинишича, бундан буён ҳар бир қишлоқ ёки маҳалла ўз йўналиши ва «ўсиш нуқталари»дан келиб чиқиб, ривожлантирилади. Бунинг учун Президент 2021 йилда 3 триллион сўмлик Ҳудудлар инфратузилмасини ривожлантириш жамғармасини тузишни таклиф қилди. Жамғарма маблағлари маҳаллий Кенгашлар таклифларига асосан, инфратузилма лойиҳаларини қўшма молиялаштиришга йўналтирилади.
Шунингдек, 84 та туман ва шаҳарда саноат салоҳиятини янада ошириш учун 100 та технопарк, кичик саноат зоналари, ҳудудий кластер ва махсус логистика марказлари ташкил этилади. 2021 йилда эркин иқтисодий ва кичик саноат зоналарини зарур инфратузилмалар билан таъминлаш учун 1,6 триллион сўм йўналтирилади.
«Ҳукумат ҳудудларда 130 минг километр узунликдаги паст кучланишли электр тармоқлари ва 40 мингдан ортиқ трансформаторни босқичма-босқич янгилаш дастурини келгуси йил 1 апрелга қадар тасдиқлаши зарур. Шунингдек, 5 мингдан ортиқ таъмирталаб кўприкни тиклаш бўйича дастур қабул қилинади. Бу ишларга 2021 йилда 400 миллиард сўм маблағ йўналтирилади», — деди Мирзиёев.
Мавзуга доир:
- «Қийин бўляпти, лекин ўрганяпмиз». Шавкат Мирзиёев сўз эркинлиги соҳасида амалга оширилаётган ишлар ҳақида
- Шавкат Мирзиёев: Президент сайловлари халқаро тамойиллар асосида ўтказилиши керак
- «Коррупцияга тоқатсизлик ҳаётимиз бир қисмига айланиши керак» — Шавкат Мирзиёев
- Андижонда 2021 йил номи ёзилган баннер Президент мурожаатномаси тугамай ўрнатилди
Изоҳ (0)