Хавфли гўзаллик: косметика воситалари кўзга қандай зарар етказиши мумкин?

Бугунги кунда гўзаллик маҳсулотлари терига қандай таъсир қилиши ҳақида жуда кўп мунозаралар мавжуд. Аммо улар кўз соғлиғи учун қай даржада хавфли экани ҳақида ҳеч қандай фикр билдирилмайди. Маълум бўлишича, мунтазам равишда кўзларга турли хил бўёқлар суриш натижасида улар хавф остида қолади.

Кўз соҳаси билан алоқа

Энг биринчи хавф косметик воситаларининг кўз юзасига кириб бориши билан баҳоланади. Масалан, қовоқлар устига тортиладиган қора бўёқ кўзга жуда яқин жойлашади. Шу жумладан туш ҳам.

Ташқи томондан кўзлар ёш қатлами билан қопланган. Ушбу суюқлик шох парданинг сиртини намлайди ва уни ҳимоя қилади. Унга косметик воситаларнинг бир зарраси тушса ҳам кўз қизариши, қичишиши ва ачишиши юзага келади. Агар бундай ҳолат мунтазам равишда кузатилса, ёш қатламининг барқарорлиги бузилади ва кўз юзаси ташқи муҳитга ўта сезгир бўлиб қолади.

Кўз ёш қатламининг бузилиши қуруқ кўз синдроми ривожланишига олиб келади ва бу ўта жиддий касаллик ҳисобланади. Қатламнинг сифати ва миқдори ўзгариши оқибатида кўз юзаси ҳимоясиз қолади. Натижада асаб толалари очилиб, кўзлар етарлича намланмайди, чарчоқ, ачишиш ҳиси пайдо бўлади. Бундай ҳолда вақтни ортга сурмасдан зудлик билан шифокор кўригига бориш зарур.

Шунинг учун пардозни ювиш ва тозалашда ҳам эҳтиёт бўлиш керак. Воситалар кўзни юмиб ишлатилса ҳам у, албатта, ички қисмга кириши мумкин. Бу билан кўз ёш қатлами яна хавф остида қолади.

Аллергия

Юқори сифатга эга косметик воситалар аллергияга қарши таркибий қисмлардан тайёрланади. Аммо уларнинг баъзиларида ҳам қизариш, қичишиш каби ҳолатлар кузатилади.

Статистик маълумотларга кўра, энг кўп аллергия берувчи косметик воситаси сув ўтказмайдиган туш ҳисобланади. Улардан яна бири, бу киприкларни узун қилиб кўрсатувчи тушдир. Бундай воситалардан ҳар куни фойдаланиш юқорида келтирилган муаммоларга олиб келиши мумкин.

Кўз атрофидаги тери жуда нозик ва сезгир бўлиб, бўяниш маҳсулотларини танлашда жуда талабчан бўлиш керак. Тошма, терининг шишиши, қичишиш, қизариш каби хусусиятлар аллергик реакция аломати бўлиб, фойдаланилган маҳсулотлар мос келмаганлигидан дарак беради.

Шунингдек, муддати ўтган косметик воситалардан фойдаланиш ҳам ушбу касалликларга олиб келиши мумкин. Белгиланган санадан бир неча ой ўтган маҳсулотларда бактериялар кўпайиб, шиллиқ қаватга тушади ва хавфли касалликларни келтириб чиқаради.

Механик шикастланиш

Косметик воситаларни қўллашда тасодифан кўз соҳасига зарар етказиш эҳтимоли ҳам мавжуд. Масалан, кўз остига чизувчи қаламлар кўз пардасининг парчаланиши, тирналиши ёки кесилишига олиб келиши мумкин. Ушбу жароҳатлар туфайли оғриқ ва қизариш кузатилади. Бундай вазиятда дарҳол офталмолог кўригидан ўтиш зарур. Зарарланган қатламга инфекция тушиб қолмасидан аввал шифокор тавсияси бўйича даволаш курси ёки антибактериал томчилар қўллаш мумкин.