Ҳомиладорлик даврида турли хилдаги оғриқлар бўлиши сир эмас. Шундай оғриқлардан бири бачадон юмалоқ бойлами оғриғи деб аталади. Шифокор Хуршид Аъзамхўжаев ҳомиладор аёлларда тез-тез кузатиладиган қорин пастки қисмидаги оғриқ сабаби ҳақида маълумот беради.
Бачадон юмалоқ бойлами оғриғи — Round ligament pain (RLP). Бу ҳомиладорлик пайтида бачадоннинг юмалоқ бойлами билан боғлик оғриқдир.
RL: Ҳомиладорлик даврининг энг кўп тарқалган ноқулайликларидан бири ва одатда ҳомиладорликнинг ўн олтинчи ҳафтасидан йигирма иккинчи ҳафтасигача давом этади, гоҳида туққунича давом этиши мумкин. Бачадон юмалоқ бойлами қорин бўшлиғида бачадон осилиб турадиган бойламлардан бири, у бачадон ва чов орасида жойлашган, тос ички қисмидан бошланиб чов терисида тугайди. Ҳомиладорликда бачадон катталашганда юмалоқ бойлам чўзилади ва зўриқади. Оғриқ одатда қоринни икки ён пастки қисмида ва чов соҳасида кузатилади.
Ҳомиладор аёл ҳаракат қилганида (ўрнидан туриш пайтида, ўтирмоқчи бўлганда ва ҳоказо) ҳолатларда кучайиши мумкин. Баъзи ҳомиладор аёлларда, тос веналарининг кенгайиши юмалоқ бачадон бойлами оғриғини кучайтиради. Тос веналарини кенгайиши (варикоз), юмалоқ бойлам веналарининг ҳам кенгайишига олиб келади (ўзаро бир-бири билан боғланган).
Аломатлари:- қориннинг пастки қисмида чов соҳасини қамраб, тўсатдан бўладиган оғриқ;
- тўсатдан ҳаракатланганда ёки жисмоний машқлар бажарганда қорин бўшлиғида санчиқли оғриқ бир неча сония давом этиши мумкин;
- оғриқ қорин бир ён пастки қисмида ёки икки ён пастки қисмида давомий бўлиши мумкин.
- авваламбор акушер-гинекологга мурожаат қилинг. Оғриқнинг сабаби бошқа касалликлар туфайли бўлиши мумкин, масалан, аппендецит, буйрак тош касаллиги, бачадон мушакларининг қисқариши (яъни тонуси ошиши) ва бошқа касалликларда;
- оғриқ бачадон юмалоқ бойлами сабабли бўлаётган бўлса: оғриқ пайдо бўлганда тик турган бўлсангиз, секин аста ўтиринг, агар ўтирган бўлсангиз, ўрнингиздан туринг ва озгина юринг.
- одатда оғриқ бир томондан бўлади. Оғримаётган томонингизга секин аста ётинг, бу бачадон юмалоқ бойламининг зўриқишини камайтиради ва оғриқни тўхтатади.
- полга эмаклаган ҳолда туринг (тўрт оёқлаб), думба-сон қисмини туширмаган ҳолатда бошингизни пастга туширинг;
- ёстиқлардан фойдаланинг. Дам олиш учун ётганингизда тиззаларингиз орасига ва бўкса қисмингизга ёстиқчалар қўйиб ётинг;
- етарлича суюқлик ичинг, бу соғлигингизга фойдали мушак ва мушак бойламларини чўзилувчанлигини кучайтиради. Ва яна қабзият бўлишини, сийдик йўлларида инфекция ривожланишининг олдини олади;
- ҳомиладорлар учун мўлжалланган бандажлардан фойдаланинг. Кийим остидан тақилгани учун ташқаридан кўринмайди, лекин бачадонни бир хил ҳолатда ушлаб кўтариб туради (айниқса узоқ жойларга, сафарга чиқишингизга тўғри келганида), ҳамда бел соҳасига ҳам қувват бўлади.
Ҳомиладорлик даврингиз асоратсиз ўтсин, доимо соғ-саломат бўлинг.
Изоҳ (0)