Европада оралиқ масофаланишга риоя қилмаган ҳайдовчиларни жаримага тортишга қодир камера тест режимида ишга туширилди. Британиянинг М1 шоссесига ўрнатилган камералар икки ой давомида автомобиллар орасидаги оралиқ масофага риоя қилмаслик бўйича 26 мингта қоидабузарликни аниқлаган. Ҳайдовчиларга ёзма равишда огоҳлантириш хати юборилган, деб хабар беради Motor.
Daily Mail нашри янги авлод камераларининг ишлаш принципи ҳақидаги маълумотлар билан бўлишган. Маълум бўлишича, қурилма транспорт воситалари орасидаги масофага эмас, балки вақт интервалига қараб хавфсиз оралиқни ҳисоблайди. Агарда машиналар икки сониядан камроқ фарқ билан ҳаракатланса, ҳайдовчига «бахт мактуби» юборилади.
Маҳаллий амалдорларнинг таъкидлашича, ҳозирча жарималар ҳақида ҳеч гап йўқ: янги авлод камераси «бошқарув маданиятини оширишга ёрдам бериш» учун яратилган. Шу блан бирга, автоматика почта орқали олинган огоҳлантириш хатидан сўнг яхшироқ ҳайдашни бошлаган ёки йўқлигини таҳлил қилади.
Highways England давлат операторининг баҳолашича, Буюк Британия трассаларида қайд этиладиган ҳар саккизта ЙТҲнинг биттаси оралиқ масофага риоя қилинмаган ҳолда ҳаракатланиш оқибатида юзага келади.
Йўл ҳаракати қоидаларининг бузилишини қайд этишга мўлжалланган фото ва видео жамланмалар имконияти тобора ортмоқда: аввалига камералар фақат тезликни қайд этар эди; эндиликда қурилмалар хавфсизлик камарини тақмаган ҳайдовчиларни аниқлаш, светофорнинг тақиқловчи сигналида ҳаракатланганлик, жамоат транспорти йўлагида юрганлик ва бошқа қатор қоидабузарликлар учун жарима белгилашни ўрганиб олган.
Изоҳ (0)