Коррупцияга қарши курашиш агентлиги ўз ваколатлари доирасида блогерлар ва ОАВ томонидан Жиззах вилоятидаги давлат харидлари билан боғлиқ танловлар юзасидан сўров юбориб, вазиятни ўрганишни бошлади. Бу ҳақда агентлик матбуот хизмати хабар берди.
Давлат харидлари портали маълумотларига кўра, Жиззах вилояти ҳокими Эргаш Солиевнинг қизи ҳам таъсисчилар орасида бўлган My Flower компанияси Жиззахнинг Шароф Рашидов кўчасини кўкаламзорлаштириш бўйича танловда йил давомида икки марта ғолиб бўлган. Бунга Telegram’даги «Давлетовуз» канали эътибор қаратган. Вилоят ҳокимлигининг «Ягона буюртмачи хизмати» инжиниринг компанияси томонидан буюртма берилган лойиҳаларнинг умумий қиймати 2 миллиард сўмдан зиёдроқни ташкил этади.
Коррупцияга қарши курашиш агентлиги матбуот хизмати ўрганишлар натижалари бўйича ОАВ ва кенг жамоатчиликка батафсил маълумот берилишини маълум қилган.
Агентликнинг қайд этишича, давлат харидлари соҳасидаги шартномаларнинг очиқ маълумотлар порталида эълон қилиниши натижасида тизим шаффофлашган.
«Бундан ташқари оммавий ахборот воситалари, блогерлар ҳамда фаол фуқаролар саъй-ҳаракатлари туфайли мазкур соҳадаги коррупцион ва манфаатлар тўқнашуви акс этган бўлиши мумкин бўлган ҳолатлар ҳам юзага чиқмоқда», — дейилади хабарда.
Агентлик давлат харидлари соҳасида учраётган тизимли қонун бузилиш ҳолатлари таҳлилидан келиб чиққан ҳолда мазкур жараёнда юзага келаётган коррупцион ҳолат ва манфаатлар тўқнашувини тартибга солувчи ва жавобгарликни кучайтиришни назарда тутадиган таклифлар ишлаб чиқилаётганини ҳам маълум қилган.
Аввалроқ Андижонда давлат буюртмаларини буюртмачининг ўзига тегишли компаниялар тақсимлаб олгани маълум бўлганди. Хусусан, «Ягона буюртмачи хизмати» ИК раҳбари Муҳиддин Қодиров ўзига тегишли бўлган Milano Biznes Servis МЧЖга қарийб 20 миллиард сўмлик қурилишга оид давлат буюртмаларини олган.
Изоҳ (0)