Хоразм вилояти ҳокимлиги ҳузуридаги «Ягона буюртмачи хизмати» инжиниринг компанияси мансабдорларига нисбатан очилган жиноят иши тергови давом этмоқда, дея хабар бермоқда «Kun.uz».
Мансабдорлар 41 та ҳолатда қурилиш объектлари тендерсиз бериб юборилгани аниқланган.
Жиноят ишининг қўзғатилишига «Ягона буюртмачи хизмати» мансабдор шахслари ноқонуний равишда танлов ўтказиб, лаёқатсиз қурувчиларга қурилиш объектларини топшириши юзасидан тўпланган ҳужжатлар асос бўлган.
Хоразм вилояти прокуратураси маълум қилишича, 2019 йилда 2,5 миллиард сўмлик, 2020 йилнинг 5 ойида 279,8 миллион сўмлик, жами 2,79 миллиард сўмлик бажарилмаган ишлар қўшиб ёзилиб, давлат ва жамият манфаатларига жуда кўп миқдорда зарар етказилган.
Бу ҳолатлар бўйича 11 нафар шахс жиноий жавобгарликка тортилиб, айбдорлардан 2,56 миллиард сўм миқдордаги зарар ундирилиши таъминланган.
Ҳозирда вилоят прокуратураси томонидан мансабдор шахсларнинг бюджет маблағларини талон-торож қилинишига шароит яратиб бергани билан бирга, уларнинг бошқа жиноятларини фош қилиш мақсадида тергов гуруҳи тузилиб, дастлабки тергов ҳаракатлари олиб борилмоқда.
Жиноят кодексининг 205-моддаси (ҳокимият ва мансаб ваколатини суиистеъмол қилиш) билан очилган иш бўйича терговни Хоразм вилояти прокуратурасининг ўта оғир жиноятларни тергов қилиш бўлими ўтказмоқда.
Аввалроқ Тошкентда лойиҳа қиймати 9,6 млн доллар бўлган рақамли ситуацион марказ тендерсиз қурилиши ҳамда Ўзбекистонда 500 дан ортиқ арзон уй-жойларга фотоэлектр тизимини ўрнатиш тендер савдоларисиз амалга оширилгани ҳақида хабар берилганди.
Изоҳ (0)