23-chaqiriq Knesset (Isroil parlamenti) 2020-yil uchun mamlakat davlat budjetini tasdiqlash muddati o‘tgani tufayli avtomatik tarzda tarqatib yuborildi, deb yozadi “RBK”. Qonunchilikka ko‘ra, muddatidan avvalgi parlament saylovlari 23-mart kuni bo‘lib o‘tishi kerak.
“Men hammani keskinlikni kuchaytirishdan tiyilishga hamda saylov kampaniyasi tashkillashtirilgan holda, zo‘ravonlik o‘tkazilmagan holatda bo‘lib o‘tishi va tugashi uchun bor imkoniyatni ishga solishga chaqiraman”, — dedi Knesset spikeri Yariv Levin parlament avtomatik tarzda tarqatilganini e’lon qilayotib.
Shu tariqa Isroilda ikki yil ichidagi to‘rtinchi navbatdan tashqari parlament saylovlari o‘tkazilishi kutilmoqda. Avvalgi saylovlarda o‘ng va so‘l partiyalar parlamentda deyarli bir xil miqdorda o‘rinlarga ega bo‘lgan, bu esa hukumat shakllanishiga to‘sqinlik qilgan edi.
2020-yil martidagi saylovlardan keyin Isroil bosh vaziri Binyamin Netanyaxuning “Likud” partiyasi va Bosh shtab sobiq rahbari Beni Gansning “Kaxol-Lavan” partiyasi rotatsiya asosidagi hukumatni shakllantirish bo‘yicha muzokaralar olib bordi, ular aprel oxirida muvaffaqiyatli yakunlandi.
Shundan keyin parlament yangi koalitsion hukumat tarkibini tasdiqladi. Netanyaxu 18 oyga bosh vazir bo‘lib qolishi kerak edi. Muddatning ikkinchi yarmida esa hukumat rahbari o‘rinbosari lavozimini egallab turgan Gans Isroil bosh vaziri bo‘lishi kerak edi, Netanyaxu shunda uning lavozimiga o‘tar edi. Knesset lavozimlar almashadigan sanani 2021-yil 17-noyabr etib belgiladi.
Mavzuga doir:
- Isroil koronavirusning yangi shtammi sababli xorijliklarning mamlakatga kirishini taqiqlaydi
- Isroil bosh vaziri onlayn efirda Pfizer vaksinasi bilan emlandi
- Donald Tramp Marokash va Isroil o‘rtasida diplomatik aloqalar o‘rnatilganini ma’lum qildi
- Isroil harbiylari AQShning Eronga amalga oshiradigan ehtimoliy hujumiga tayyorlanmoqda
Izoh (0)