Moskva meri Sergey Sobyanin shahar aholisining qanchasi koronavirusga chalinib chiqqanini aytdi

Moskva meri Sergey Sobyanin Moskva aholisining taxminan 2,5-3 million nafari koronavirusga chalinib chiqqanini aytdi. “RBK”ning yozishicha, bu haqda u “Perviy kanal”ga bergan intervyusida ma’lum qilgan.

“Yozda ham kasallanib chiqqanimiz va kuzda kasallanganlar soni sezilarli darajada ortganini hisobga olsak, menimcha bu raqam 2,5-3 million kishi atrofida”, — degan Sobyanin moskvaliklarning qanchasi COVID-19’ga chalingani haqidagi savolga javoban.

11-noyabrda Sobyanin Moskva bir necha oydan so‘ng COVID-19 bilan kasallanishning eng yuqori cho‘qqisini yengib o‘tishini aytgandi, shu bilan birga 2021-yil boshlanishi og‘ir bo‘lishini, ehtimol joriy yilgidan ham og‘irroq bo‘lishi mumkinligini bildirgan.

Kuni kecha mer yaqin haftalarda shahardagi epidemiologik vaziyat yomonlashishda davom etishi mumkinligini ma’lum qildi.

Moskvada koronavirus tarqalishi kuchaygani sababli yangi cheklovlar joriy qilingan. Xususan, umumiy ovqatlanish shoxobchalari (restoran, kafe, barlar), shuningdek, tungi klublar, karaoke, bouling klublar soat 23:00 dan 06:00 gacha ishlamaydi. Moskvadagi OTM va kollej talabalari masofaviy ta’limga o‘tdi. Barcha cheklovlar ikki oy davomida — 2020-yilning 13-noyabridan 2021-yilning 15-yanvarigacha amalda bo‘ladi. Bundan tashqari, Moskva hukumati Yangi yil munosabati bilan o‘tkaziladigan ommaviy tadbirlardan voz kechadi

So‘nggi sutkada Moskvada 4477 kishida koronavirus qayd etildi. Epidemiya boshlanganidan buyon kasallanganlarning umumiy soni 485,5 ming nafardan oshdi. Poytaxtda sutkalik kasallanganlar soni 5 ming kishidan kam bo‘lgan holat oxirgi marta 2-noyabr kuni qayd etilgan.