Ўзбекистонда Россияга борадиган меҳнат мигрантлари «Sputnik V» вакцинаси билан эмланади

Ўзбекистон Россияга борадиган меҳнат мигрантларини коронавирусга қарши эмлаш учун «Sputnik V» вакцинасидан 1 миллион доза буюртма берди. «Интерфакс»нинг хабар беришича, бу ҳақда 21 декабрь куни Россиянинг Ўзбекистондаги элчиси Владимир Тюрденев маълум қилди.

«Россияга ишлашга кетаётган меҳнат мигрантларини эмлаш учун коронавирусга қарши ‘Sputnik V’ вакцинасининг 1 миллион дозасини етказиб бериш тўғрисида битим имзоланди»,  — деган Тюрденев 21 декабрь куни ўтказилган матбуот анжуманида.

Шунингдек, келгуси йили Россиядан COVID-19 га қарши иккинчи «ЭпиВакКорона» вакцинасини харид қилиш учун шартнома тузиш кутилаётганини маълум қилган.

Декабрь ойи бошларида Россия саноат ва савдо вазири Денис Мантуров Ўзбекистонда рўйхатдан ўтказиш ва мамлакат ҳудудида вакциналар ишлаб чиқариш саноатини ишга тушириш учун зарур бўлган коронавирусга қарши «Sputnik V» вакцинасининг 100 та дозасини шахсан ўзи Тошкентга олиб келган эди.

Ноябрь охирида эса соғлиқни сақлаш вазири 2020 йил охири ёки 2021 йил бошларида Ўзбекистон «Sputnik V» вакцинасининг клиник синовларига киришишни мўлжаллаётганини маълум қилганди.

Ўзбекистонда 2021 йилнинг июнига қадар 60 фоизгача аҳолини коронавирусга қарши эмлаш режалаштирилган.