Қашқадарё вилояти ҳокими Зоир Мирзаев Қарши туманида аҳолига ҳокимсиз мурожаатнома йўлланганини танқид қилиб, «мен бу ҳолатни ҳазм қилолмайман», деди. Бу ҳақда «Дарё» мухбири хабар бермоқда.
Зоир Мирзаев, шунингдек, журналист ва блогерлар билан тўғридан-тўғри мулоқотга чиқолмай, ўрнига ўринбосарларини рўпара қиладиган раҳбарлар ҳақида гапириб, «бундай раҳбарлар ё савиясиз, ёки саволларга жавоб беришдан қўрқади», деган.
Аввалроқ Қарши туманида бўлиб ўтган туман кенгаши сессиясида ҳудуд раҳбари Мақсуда Мустафоева бетоблиги сабаб қатнаша олмагани, шу сабаб ҳокимнинг аҳолига мурожаатномасини унинг биринчи ўринбосари Сардор Абдуллаев ўқиб эшиттиргани ҳақида хабар берилган эди.
Сессия охирида журналист ва блогерлар туман масъулларидан ҳоким Мустафоеванинг бетоблиги ва сессияда қатнашмаслиги ҳокимлик ахборот хизматига аввалдан маълуммиди ёки сессия аввалида ошкор бўлдими, деб сўраган.
Бу саволга жавоб берган ҳоким ўринбосари эса: «Сессияга ҳоким келиши кутилганди. Дабдурустдан шундай бўлиб қолди. Бироқ бундан туман ҳокимлиги ахборот хизматининг хабари бор эди», деб жавоб берган.
«Дарё» мухбирининг қўшимча қилишича, Зоир Мирзаев Қарши туманида ҳоким иштирокида матбуот анжумани ташкил этилиб, журналист ва блогерларни қизиқтираётган саволларга шахсан ҳокимнинг ўзи жавоб бериши кераклигини таъкидлаган.
Туманда аҳоли ва депутатларга қайтадан мурожаатнома йўлланиши ҳам кутилмоқда.
Изоҳ (0)