АҚШда коронавирус билан касалланиш ҳолатлари ортаётгани сабаб кўнгилочар муассасаларга янги тақиқлар ўрнатилмоқда. Бизнесни шу каби оғир вазиятдан олиб чиқиш учун Детройтда истиқомат қилувчи кичик Теренс Жексон «дунёдаги биринчи мобил боуилинг»ни яратди, деб хабар беради CARakoom.
Luxury Strike Bowling номини олган янгилик Ford F-450’га ўрнатилган 16 метрлик ярим тиркамадан иборат. Унинг ичида ҳар бири тўпни автоматик равишда ортга қайтарувчи ва пинспоттерли иккита 7,5 метрга тенг йўлак жойлашган. Бу кўпчилик ўрганган одатдаги боулинг эмас, шу сабабли шарлар оғирлиги 1,3-1,8 килограммдан ошмайди.
«Бундай нарса ҳақида ҳеч қачон ўйлаб кўрмаган эканман. Бу шунчаки ажойиб», — дейди ўзининг 35 ёшга тўлганини дўстлари билан боулинг ўйнаб нишонлаган Одри Васкес.
Маълум қилинишича, Luxury Strike Bowling биринчи бор Жексон томонидан икки йиллар олдин, кечки базмлар учун автобуслар ишлаб чиқариш билан шуғулланиб юрган вақтида ўйлаб топилган. Бироқ уни амалга ошириш ғоясига пандемия туртки бўлган.
Жексон трейлерни қуришни молиялаштириш учун барча кўчмас мулкини сотган. 300 минг доллардан ортиқроқ маблағ сарфлаб, у ўз бизнесини йўлга қўйган.
«Уйга олиб кетиб бўлмайдиган ягона спорт тури бу — боулинг», — дейди Жексон.
Стартапи машҳурликка эришган Жексон иккинчи трейлерини қуришни бошлаган. Мобил боулинг-клубнинг яна бир афзаллиги у ҳар куни дезинфекция қилинади.
Изоҳ (0)