Кенгурулар одамлар билан мулоқот қила олиши мумкин, улар эътиборни тортиш орқали озиқланиш учун ёрдам сўрайди. Энг қизиғи, улар алоқани итларга хос бўлган қараш каби амалга оширади. Бу Сидней ва Лондондаги Рохемптон университети томонидан ўтказилган тадқиқотда маълум бўлди, деб ёзади Meduza.
Ўтказилган тажриба икки босқичдан иборат бўлиб, биринчисида турли хилдаги 16 та кенгуру иштирок этган. Унга кўра, ҳайвонларга озиқ-овқат идишларини очиш ўргатилган. Албатта, ҳаммаси ҳам бундай топшириқни бажара олмаган ва натижада 11 та кенгуру кейинги босқичга ўтган.
Иккинчи босқичда эса кенгурулар топа олмаслиги учун озиқ-овқатлар махсус идишларга жойлаштирилган. Шунингдек, уларнинг ёнида кузатувчилар ҳам бўлган. Озиқаларнинг махсус идишдалигини кўрган кенгурулар одам билан мулоқот қила бошлаган ва унга 5 маротаба қараб, махсус идишлар ичидаги егуликка муҳтожлигини тушунтирган. Баъзилари эса кузатувчига яқинлашиб, унинг диққатини тортишга уринган ва кийимларидан тортиб овқатларни олишга мажбурлаган.
Тажриба муаллифлари бундай хатти-ҳаракатлардан сўнг кенгурулардаги когнитив функциялар тахмин қилинганидан кўра юқори эканлигига амин бўлди. Одатда юз йиллар давомида одамлар билан муносабатда бўлишни ўрганган уй ҳайвонларидагина шундай ҳолатлар кузатилади.
Бундан ташқари, тадқиқотчилар кенгурулар бундай усулдан фойдаланган ҳолда нафақат одамлар, балки бошқа жонзотлар билан ҳам мулоқот қилиши мумкин, деган хулосага келган.
Изоҳ (0)