Kengurular odamlar bilan muloqot qila olishi mumkin, ular e’tiborni tortish orqali oziqlanish uchun yordam so‘raydi. Eng qizig‘i, ular aloqani itlarga xos bo‘lgan qarash kabi amalga oshiradi. Bu Sidney va Londondagi Roxempton universiteti tomonidan o‘tkazilgan tadqiqotda ma’lum bo‘ldi, deb yozadi Meduza.
O‘tkazilgan tajriba ikki bosqichdan iborat bo‘lib, birinchisida turli xildagi 16 ta kenguru ishtirok etgan. Unga ko‘ra, hayvonlarga oziq-ovqat idishlarini ochish o‘rgatilgan. Albatta, hammasi ham bunday topshiriqni bajara olmagan va natijada 11 ta kenguru keyingi bosqichga o‘tgan.
Ikkinchi bosqichda esa kengurular topa olmasligi uchun oziq-ovqatlar maxsus idishlarga joylashtirilgan. Shuningdek, ularning yonida kuzatuvchilar ham bo‘lgan. Oziqalarning maxsus idishdaligini ko‘rgan kengurular odam bilan muloqot qila boshlagan va unga 5 marotaba qarab, maxsus idishlar ichidagi yegulikka muhtojligini tushuntirgan. Ba’zilari esa kuzatuvchiga yaqinlashib, uning diqqatini tortishga uringan va kiyimlaridan tortib ovqatlarni olishga majburlagan.
Tajriba mualliflari bunday xatti-harakatlardan so‘ng kengurulardagi kognitiv funksiyalar taxmin qilinganidan ko‘ra yuqori ekanligiga amin bo‘ldi. Odatda yuz yillar davomida odamlar bilan munosabatda bo‘lishni o‘rgangan uy hayvonlaridagina shunday holatlar kuzatiladi.
Bundan tashqari, tadqiqotchilar kengurular bunday usuldan foydalangan holda nafaqat odamlar, balki boshqa jonzotlar bilan ham muloqot qilishi mumkin, degan xulosaga kelgan.
Izoh (0)