Oppo кредит картаси ўлчамидек келадиган йиғма смартфонни тақдим этди

Хитойнинг Oppo бренди Япониянинг Nendo дизайнерлик студияси билан ҳамкорликда янги концептуал смартфонни яратди. «Телефон-слайдер» номини олган қурилма учталик конструкцияга эга бўлиб, уни бир неча маротаба буклаш мумкин, деб хабар беради Hi-Tech.Mail.ru.

1,5 дюймли дисплей ўрнатилган юқори модулидан хабарномаларни кўришда, телефон қўнғироқларига жавоб бериш ёки мусиқий плейерни бошқаришда фойдаланса бўлади.

Бошқа модулга эса 3,15 дюймли дисплей ўрнатилган бўлиб, компаниянинг таъкидлашича, бу сурат ва ўйинлар билан ишлаш учун етарли ҳисобланади. Телефон тўлиқ ёйилган ҳолатда ингичка ҳошияларга эга 7 дюймли экранга эга бўлади. Ушбу ҳолатда смартфон жуда узундек кўринади, бироқ кўп вазифаларни бажаришда ёки саҳифани альбом кўринишида очишда қулай бўлиши мумкин.

Oppo қурилмасининг жамланмасидан стилус ҳам ўрин олган — уни смартфон корпусига яшириш мумкин. Телефон корпусининг ташқи томонида камеранинг учта сенсори ва ёруғлик диодли чақноқ жойлашган. Ҳозирча компания қурилманинг техник тавсифини ошкор этмаган.

Янги Oppo концепциясининг дизайни ажойиб ишланган, бироқ компания яқин орада бу каби қурилмани ишлаб чиқармаса керак. Чунки савдолар бошланиши ҳақида ҳеч қандай маълумотлар йўқ, шу сабабли смартфоннинг тижорий дебютини бир неча йил кутишга тўғри келиши мумкин.

Аввалроқ Хитойнинг TCL компанияси 6,7 дюймга экранини 4,5 дюймга қадар кичрайтириш мумкин бўлган «рулон-смартфон» прототипини намойиш этгани тўғрисида хабар берилганди.