Янги Nubia смартфонига «ақлли» шишага эга буқаламун-қопқоқ ўрнатилади (видео)

Интернетда тугмаси босилганида қопқоғи шаффоф кўринишга кирадиган смартфоннинг видеоси тарқалди, деб хабар беради «Hi-Tech.Mail.ru».

Видеода яқин ойлар ичида тақдим этилиши кутилаётган Nubia Red Magic 6 смартфони тасвирланган. Афтидан, геймерлар учун мўлжалланган смартфон дизайни унинг асосий ютуғига айланади — корпус қопқоғи сифатида «ақлли» ёки электрохром шишадан фойдаланилган.

Ушбу материал одатдаги режимда тўлиқ шаффоф, худди ойнадек, бироқ унга кучсиз электр заряди юборилса, у қораяди. Шу сабабли смартфон қопқоғида алоҳида шаффоф соҳани пайдо қилиш мумкин. У орқали қурилма конструкциясини тўлиқ кўриш ёки бутунлай қорайтириб қўйса бўлади. Мазкур ғоя фақатгина дизайн учун бўлиб, унинг функционаллиги йўқ.

Олдинроқ бу каби материалдан OnePlus концептуал смартфонида ҳам фойдаланилган эди, бироқ унда орқа қопқоқ эмас, балки камера объективи қопланган.