АҚШда коронавирус инфекцияси оқибатида 300 586 киши вафот этди, деб ёзади «РБК» Жонс Ҳопкинс университети маълумотларига таяниб.
Олимлар ҳисоб-китобларига кўра, пандемия бошидан буён мамлакатда жами 16 миллиондан ортиқ киши COVID-19’га чалинган, бу эса АҚШни касалланганлар сони бўйича дунёда етакчига айлантиради. Энг кўп касалланганлар ва вафот этганлар Калифорнияда қайд этилган — тегишли равишда 525 486 ва 8298 киши.
Эслатиб ўтамиз, АҚШда 14 декабрь, душанба куни коронавирусга қарши эмлаш бошланди, баъзи штатларда эса бу жараён 15 декабрдан бошланади. Pfizer ва BioNTech компаниялари томонидан яратилган вакцинанинг дастлабки дозалари дам олиш кунлари бутун мамлакат бўйлаб тарқатилган. АҚШда 2020 йил якунига қадар тахминан 20 миллион кишини коронавирусга қарши эмлаш режалаштирилмоқда. 2021 йилнинг дастлабки икки ойида эса бу рақам 100 миллион кишига етиши керак.
11 декабрь куни АҚШда бир суткада рекорд даражада кўп одам — 231,7 минг кишида коронавирус аниқланган эди. Шу муносабат билан АҚШ Озиқ-овқат маҳсулотлари ва дори воситаларини назорат қилиш бошқармаси (FDA) Pfizer ва BioNTech компаниялари томонидан яратилган коронавирусга қарши вакциналардан фойдаланишга рухсат берди.
Pfizer ва BioNTech ўзининг BNT1622b вакцинаси тадқиқотларнинг учинчи босқичи якунлари бўйича 95 фоиз самарадорлик кўрсатганини маълум қилганди. Таққослаш учун: Россиянинг «Спутник V» вакцинаси самарадорлиги ўз ишлаб чиқувчилари томонидан 92 фоизга, Америка Moderna компанияси вакцинаси — 94,1 фоизга, AstraZeneca компанияси вакцинаси — 70 фоизга баҳоланган.
Мавзуга доир:
- Сайловчилар ҳайъати Жо Байденнинг АҚШ президенти сайловларидаги ғалабасини тасдиқлади
- АҚШда юқори мансабли амалдорлар биринчи бўлиб коронавирусга қарши эмланиши хабар берилди. Аммо Трамп бундан воз кечди
- АҚШда коронавирусни юқтириб олганлар сони 16 млн кишидан ошди
- АҚШда COVID-19 қурбонлари сони мамлакатнинг Иккинчи Жаҳон урушидаги жанговар йўқотишларидан ҳам ошиб кетди
Изоҳ (0)