15 декабрга ўтар кечаси Бошқирдистоннинг Абзелилов туманидаги Ишбулдино қишлоғида жойлашган хусусий қариялар уйида чиққан ёнғин оқибатида 11 киши ҳалок бўлди, деб ёзади Meduza.
Бир қаватли ёғоч бино бутунлай ёниб кетди, ёнғин майдони 72 квадрат метрни ташкил қилди. Пансионатнинг бир ходимаси ва ўша ерда яшовчи яна уч киши жон сақлаб қолишга муваффақ бўлган, бинода бўлган бошқа одамларнинг барчаси ҳалок бўлган.
Дастлабки маълумотларга кўра, ёнғинга оловга эҳтиётсизлик билан муносабатда бўлиш сабаб бўлган бўлиши мумкин.
Тергов қўмитаси Ишбулдинодаги ёнғин ҳолати юзасидан эҳтиётсизлик оқибатида ўлим келтириб чиқариш ҳақида жиноят иши қўзғатди (ушбу модда бўйича тўрт йилгача озодликдан маҳрум этилиш мумкин).
Абзелилов тумани маъмуриятида маълум қилишларича, ёнғин содир бўлган пансионат қонуний ишлаган, лекин одамларни кеча-ю кундуз сақлаш ҳуқуқига эга бўлмаган. Шунингдек, қайд этилишича, қариялар уйида меъёрдан кўп одам бўлган, бино бир вақтнинг ўзида кўпи билан 10 мижозга хизмат кўрсатишга мўлжалланган.
Изоҳ (0)