Тошкентда 18—21 декабрь кунлари бўлиб ўтадиган 2020 йилги Ёшлар форуми доирасида блогерлар Азиза Қурбонова, Лазизбек Ҳамидов, Никита Макаренко ва Хушнудбек Худойбердиев иштирокида очиқ мулоқот бўлиб ўтади.
Тадбир ташкилотчиларининг «Дарё»га маълум қилишича, учрашувда ёшлар ўзларининг ҳуқуқий билимлари ва медиа саводхонликларини ошириб олишлари, шунингдек, ўзларини қизиқтирган кўплаб саволларга жавоб топишлари мумкин.
Айни пайтда Президент администрациясида фаолият олиб бораётган тележурналист Азиза Қурбонованинг Telegram’даги «Микрофон кўтарган аёл» каналини 4,5 мингдан зиёд фойдаланувчи кузатиб боради. Дизайнер Лазизбек Ҳамидов эса YouTube’даги салкам 15 минг обуначига эга «Улар» лойиҳаси муаллифи ҳисобланади.
Журналист ва мусиқачи Никита Макаренконинг Telegram’даги «Эффект Макаренко» шахсий каналига 21 мингдан ортиқ фойдаланувчи обуна бўлган. Ҳозирда ЎзА бош директорининг ўринбосари лавозимида ишлаётган ҳуқуқшунос Хушнудбек Худойбердиев эса Telegram’даги шахсий каналида 300 мингдан зиёд обуначига эга Ўзбекистондаги ягона блогер ҳисобланади.
Учрашув 19 декабрь 11:00 да Tashkent City Congress Hall’нинг «Сағбон Дарвоза» залида бўлиб ўтади. Тадбирда қатнашиш учун Тошкент ёшлар форуми учун ташкил этилган махсус сайтда рўйхатдан ўтиш лозим. Тадбирда иштирок этиш истагида бўлганлар сони чегараланган.
Тошкент Ёшлар форумидан кўзланган асосий мақсад — таълим, соғлиқни сақлаш, маданият, спорт, туризм, иқтисодиёт, банк-молия, суд-ҳуқуқ каби кўплаб соҳаларда ёш иқтидорли кадрларни излаб топиш, уларни қўллаб-қувватлаш ва кенг жамоатчиликка танитиш, ёшларни янги марраларга илҳомлантириш, малакасини ошириш, ҳукумат вакиллари ва турли соҳа раҳбарлари билан очиқ мулоқотларга киришиб, уларга ўз таклиф ва ташаббусини намойиш этишига йўл очиб беришдан иборат.
Изоҳ (0)