Шахсни камситувчи ёлғон ахборотни интернетда тарқатганларга маъмурий жавобгарликни белгилаш таклиф этилмоқда. Амалдаги қонунга кўра жиноий жавобгарликка тортилади
Олий Мажлис Қонунчилик палатасида Ўзбекистоннинг Жиноят, Жиноят-процессуал кодексларига ҳамда Маъмурий жавобгарлик тўғрисидаги кодексга ўзгартиш ва қўшимчалар киритиш ҳақидаги қонун лойиҳаси муҳокама қилинди. Бу ҳақда парламент матбуот хизмати хабар берди.
Қуйи палатанинг ташаббускор депутатлари шахснинг қадр-қимматини камситувчи, уни обрўсизлантиришга қаратилган ёлғон ахборотни ишончли маълумот кўринишида била туриб телекоммуникация, интернет тармоқларига жойлаштирганлик учун маъмурий жавобгарликни белгилашни таклиф этмоқда.
Уларнинг асослашича, амалдаги қонунчиликда бу турдаги ҳаракатни содир этган шахс тўғридан-тўғри жиноий жавобгарликка тортилиши белгиланган, таклиф этилаётган лойиҳада эса шахс шундай ҳаракатлари учун муқаддам маъмурий жавобгарликка тортилганидан кейин 1 йил давомида такроран содир этсагина жиноий жавобгарликка тортилиши назарда тутилмоқда.
Шахснинг қадр-қимматини камситувчи, уни обрўсизлантиришга олиб келадиган ёлғон ахборотни тарқатиш, шу жумладан, оммавий ахборот воситалари, телекоммуникация ёки интернет тармоқларига жойлаштириш орқали тарқатиш базавий ҳисоблаш миқдорининг 50 бараваригача миқдорда жарима солишга сабаб бўлиши қайд қилинмоқда.
Аввалроқ ушбу йиғилишда ижтимоий тармоқларда зўравонликни ёки шафқатсизликни тарғиб қилувчи видеоларни жойлаштирганлар 89 миллиом сўмгача жарима тортиш таклифи билдирилгани тўғрисида хабар берилганди.
Баъзи маъмурий ҳуқуқбузарликлар учун жарима миқдори амалдаги базавий ҳисоблаш миқдорининг 200 бараваригача миқдордан 450 бараваригача миқдорда белгиланиши таклиф этилаётгани депутатлар эътирозига сабаб бўлган. Халқ демократик партияси депутатлари жарималар миқдори аҳолининг реал даромадларидан келиб чиқиб белгиланиши зарурлиги бўйича фикр билдирган. Таклифлар асосида қонун лойиҳалари маъқуллангани айтилмоқда.
