Ҳукуматнинг «Шахслар ўртасида мулоқот воситаси сифатида ишлатиладиган имо-ишора тилини янада ривожлантириш тўғрисида»ги қарори лойиҳаси муҳокамага қўйилди.
Қарор лойиҳасига кўра, давлат бюджети маблағлари ҳисобидан ўрта мактабларда имо-ишора тили ва Брайл ёзувини ўқитиш бўйича махсус курслар ташкил этилиши режалаштирилган.
Лойиҳага мувофиқ, ўзбек имо-ишора тили ҳуқуқий мақомга эга бўлиши ва мулкчилик шаклидан қатъи назар, барча ташкилотларда, муассасаларда ва корхоналарда ўзбек имо-ишора тилини алоқа тили сифатида ишлатиш учун шарт-шароитлар яратилади.
Ўзбекистон Халқ таълими вазирлиги, Олий ва ўрта махсус таълим вазирлиги, Мактабгача таълим вазирлиги, Соғлиқни сақлаш вазирлиги, Қорақалпоғистон Вазирлар Кенгаши, Тошкент шаҳар ва вилоятлар ҳокимликлари 2021 йил 1 августга қадар:
- ҳудудлар бўйича талаблардан келиб чиққан ҳолда Қорақалпоғистон, Тошкент шаҳар ва вилоятлар, шунингдек, туманлар (шаҳарлар) марказларида жойлашган умумий ўрта таълим муассасаларида юридик шахс мақомига эга бўлмаган махсус курслар фаолиятини ташкил этиш;
- махсус курсларни имо-ишора тили ва Брайл алифбоси бўйича амалий-методик иш тажрибасига эга бўлган малакали педагог кадрлар билан таъминлаш;
- махсус курсларда ўргатиладиган имо-ишора тили ва Брайл алифбоси бўйича машғулотлар режалари ва дастурларини ишлаб чиқиш ҳамда амалиётга жорий этиш;
- 2021/2022-ўқув йилидан бошлаб махсус курсларга зарур ўқув-методик мажмуалар, ўқитувчиларни методик қўлланмалар ҳамда бадиий адабиётлар билан таъминлаш;
- махсус курслар ташкил этилганлиги юзасидан ногиронлиги бўлган шахслар ва кенг жамоатчилик ўртасида тарғибот-ташвиқот ишларини амалга ошириш чораларини кўради.
Изоҳ (0)