11 декабрь куни Олий Мажлис Сенати томонидан аҳоли ва тадбиркорлик субъектларини электр энергияси, табиий ва суюлтирилган газ ҳамда кўмир билан таъминлаш ҳолати юзасидан олиб борилган ўрганиш натижалари муҳокама қилинди. Бу ҳақда Сенат матбуот хизмати хабар берди.
Маълум қилинишича, мажлисда истеъмолчиларга электр энергияси, табиий ва суюлтирилган газ, кўмир етказиб беришда қатор муаммолар аниқлангани қайд этилган. Жумладан, энергия етказиб бериш, истеъмолчиларнинг қонуний ҳуқуқ ва манфаатларини таъминлаш бўйича электр энергияси истеъмолини чеклашда белгиланган талабларга амал қилинмаган.
«Электр таъминотини чеклашда шаффофликнинг мавжуд эмаслиги, истеъмолчиларнинг чеклов графиклари билан таништирилмаслиги аҳолига ва, айниқса, тадбиркорлик субъектларига жиддий зиён етказмоқда. Олдиндан огоҳлантирилмасдан амалга оширилган узилишлар оқибатида 1351 та улгуржи истеъмолчига 1,62 миллиард сўмга тенг моддий зарар етказилган», — дейилади хабарда.
Бундан ташқари, электр етказиб бериш ҳажмлари йил сайин ошиб бораётган бўлишига қарамасдан, мавжуд эҳтиёжни қопламаслиги ҳамда шакллантирилган прогноз ҳажмларига нисбатан истеъмолнинг юқори бўлиши жойларда электр энергиясининг белгиланган лимитини таъминлаб бера олмасликка ёки таъминлаган тақдирда ҳам амалдаги истеъмол лимитига нисбатан юқори бўлишига олиб келмоқда.
Таъкидланишича, электр энергияси инфратузилмасини модернизациялаш ва реконструкция қилиш борасида қонунчиликда белгиланган вазифалар ижросини таъминлашда камчиликларга йўл қўйилмоқда.
Электр энергетика соҳасига сўнгги уч йилда умумий қиймати 26 триллион 214 миллиард сўм инвестиция киритилган бўлсада, жойларда мазкур соҳанинг инфратузилмасини модернизация қилишга оид кўплаб муаммолар учраётгани қайд этилган. «Андижон вилоятида жорий йилда электр узатиш тармоқларини реконструкция қилиш ва янги қуриш ишлари бўйича режанинг 38,7 фоизи ҳамда трансформатор пунктлари бўйича режанинг 29,9 фоизи, Наманган вилоятида эса трансформатор пунктларини реконструкция қилиш режасининг 13,7 фоизи бажарилмаган», — дейилади Сенат хабарида.
Аввалроқ Энергетика вазирлиги матбуот хизмати 2020 йилда электр энергиясидаги узилишлар сони ва давомийлиги 2019 йилга нисбатан икки баравар камайганини маълум қилганди. Вазирлик 2020—2021 йиллар куз-қиш мавсумида Наманган, Андижон ва Фарғона вилоятларида газ ҳамда электр таъминоти ҳажми оширилишини билдирган.
Ўзбекистонда кузатилаётган электр таъминотидаги узилишларга Энергетика вазирлиги энергия истеъмоли ортганини сабаб қилиб кўрсатган. Кейинроқ Андижонда «свет»нинг кўп ўчиши аҳолидаги мавжуд қарздорлик билан боғлиқлиги маълум қилинган эди.
Изоҳ (0)