11-dekabr kuni Oliy Majlis Senati tomonidan aholi va tadbirkorlik subyektlarini elektr energiyasi, tabiiy va suyultirilgan gaz hamda ko‘mir bilan ta’minlash holati yuzasidan olib borilgan o‘rganish natijalari muhokama qilindi. Bu haqda Senat matbuot xizmati xabar berdi.
Ma’lum qilinishicha, majlisda iste’molchilarga elektr energiyasi, tabiiy va suyultirilgan gaz, ko‘mir yetkazib berishda qator muammolar aniqlangani qayd etilgan. Jumladan, energiya yetkazib berish, iste’molchilarning qonuniy huquq va manfaatlarini ta’minlash bo‘yicha elektr energiyasi iste’molini cheklashda belgilangan talablarga amal qilinmagan.
“Elektr ta’minotini cheklashda shaffoflikning mavjud emasligi, iste’molchilarning cheklov grafiklari bilan tanishtirilmasligi aholiga va, ayniqsa, tadbirkorlik subyektlariga jiddiy ziyon yetkazmoqda. Oldindan ogohlantirilmasdan amalga oshirilgan uzilishlar oqibatida 1351 ta ulgurji iste’molchiga 1,62 milliard so‘mga teng moddiy zarar yetkazilgan”, — deyiladi xabarda.
Bundan tashqari, elektr yetkazib berish hajmlari yil sayin oshib borayotgan bo‘lishiga qaramasdan, mavjud ehtiyojni qoplamasligi hamda shakllantirilgan prognoz hajmlariga nisbatan iste’molning yuqori bo‘lishi joylarda elektr energiyasining belgilangan limitini ta’minlab bera olmaslikka yoki ta’minlagan taqdirda ham amaldagi iste’mol limitiga nisbatan yuqori bo‘lishiga olib kelmoqda.
Ta’kidlanishicha, elektr energiyasi infratuzilmasini modernizatsiyalash va rekonstruksiya qilish borasida qonunchilikda belgilangan vazifalar ijrosini ta’minlashda kamchiliklarga yo‘l qo‘yilmoqda.
Elektr energetika sohasiga so‘nggi uch yilda umumiy qiymati 26 trillion 214 milliard so‘m investitsiya kiritilgan bo‘lsada, joylarda mazkur sohaning infratuzilmasini modernizatsiya qilishga oid ko‘plab muammolar uchrayotgani qayd etilgan. “Andijon viloyatida joriy yilda elektr uzatish tarmoqlarini rekonstruksiya qilish va yangi qurish ishlari bo‘yicha rejaning 38,7 foizi hamda transformator punktlari bo‘yicha rejaning 29,9 foizi, Namangan viloyatida esa transformator punktlarini rekonstruksiya qilish rejasining 13,7 foizi bajarilmagan”, — deyiladi Senat xabarida.
Avvalroq Energetika vazirligi matbuot xizmati 2020-yilda elektr energiyasidagi uzilishlar soni va davomiyligi 2019-yilga nisbatan ikki baravar kamayganini ma’lum qilgandi. Vazirlik 2020—2021-yillar kuz-qish mavsumida Namangan, Andijon va Farg‘ona viloyatlarida gaz hamda elektr ta’minoti hajmi oshirilishini bildirgan.
O‘zbekistonda kuzatilayotgan elektr ta’minotidagi uzilishlarga Energetika vazirligi energiya iste’moli ortganini sabab qilib ko‘rsatgan. Keyinroq Andijonda “svet”ning ko‘p o‘chishi aholidagi mavjud qarzdorlik bilan bog‘liqligi ma’lum qilingan edi.
Izoh (0)