Сирдарёда ўз рақобатчисини ўлдириш учун 5 минг долларга қотил ёллаган 26 ёшли тадбиркор қўлга олинди. Бу ҳақда Бош прокуратура матбуот хизмати хабар берди.
Маълумотларга кўра, 7 декабрь куни шахсини сир сақлашни сўраган Х. исмли фуқаро ариза билан мурожаат қилиб, таниши тадбиркор Ж.З. уни ўзига рақобатчи деб билган бошқа бир тадбиркорни ўлдиришга буюртма қилиб, эвазига 5 минг АҚШ доллари беришни ваъда қилган. Буюртмачи таклифи рад қилганган тақдирда бошқа шахсларни ёллаб бўлса ҳам уни ўлдиришини айтган ва олдиндан 1000 доллар бермоқчи бўлганлигини билдирган. Муқаддам «босқинчилик» жинояти учун судланганлигидан Х. ўзини жиноят содир қилишга ундаётган Ж.З.га нисбатан қонуний чора кўришни сўраган.
10 декабрь куни Сирдарё вилояти прокуратураси томонидан бошқа ҳуқуқни муҳофаза қилувчи органлар билан ҳамкорликда ўтказилган тезкор тадбирда Х. исмли шахс Гулистон шаҳрида жойлашган қабристон яқинида тадбиркор М.Д.ни қотиллик аломатлари билан ётган, юз ва бош қисми грим қилинган жасади ва уни вафот этгани сунъий равишда яратилган фотосуратини кўрсатган. Буюртмачи тадбиркор Ж.З. Мирзаобод тумани «Боғистон» маҳалласи ҳудудида унга 4 минг долларни берган вақтида ушланган.
Мазкур ҳолат юзасидан Сирдарё вилояти прокуратураси томонидан Ж.З.га нисбатан Жиноят кодексининг 25, 97-моддаси 1-қисми (қасддан одам ўлдиришга суиқасд қилиш) билан жиноят иши қўзғатилган.
Гумонланувчи Ж.З. процессуал тартибда ушланган. Тергов ҳаракатлари олиб борилмоқда.
Эслатиб ўтамиз, 2020 йилнинг июнь ойида Тошкентда сингил ўз опасини ўлдириш учун 5 минг долларга қотил ёллаган эди.
Изоҳ (0)