Xiaomi компанияси тушунмовчиликни келтириб чиқарадиган иккита суратни эълон қилди. Уларнинг бирида қизил, иккинчисида — кўк артефакт тасвирланган, деб хабар беради «Hi-Tech.Mail.ru».
Суратлар Xiaomi India global вице-президенти ва бошқарув директори Ману Кумар Жайннинг Twitter’даги саҳифасида эълон қилинган. Афтидан, компания бу орқали янги Redmi қурилмаларига эътиборни жалб этишга уринган кўринади.
Гап смартфон ҳақида кетаётганини аниқ айтиш мумкин — буни Ману Кумар Жайн ўзининг кейинги пости орқали тасдиқлаган. Шунингдек, у смартфон «ўз тури орасида биринчи бўлиб» ноёб характеристикага эга бўлишига шама қилган. У қурилманинг узоқ вақт автономлигини таъминлаб бера оладиган улкан сиғимли аккумуляторни назарда тутаётган бўлиши мумкин.
Янги смартфонга оид саволларга тез орада ойдинлик киритилади: сирли янги модель тақдим этиладиган тадбир 16 декабрь куни ўтказилиши керак.
Ноодатий суратлар дунёнинг турли нуқталарида пайдо бўлиб ва йўқолиб қолаётган монолигларга ўхшайди. Эслатиб ўтамиз, 18 ноябрь куни АҚШнинг Юта штатида ҳамда 26 ноябрь куни Руминия шимолида ташқи кўриниши билан Стенли Кубрикнинг «Фазовий саёҳатнома» фильмидагига ўхшаш учбурчак монолитлар топилгани, кейинроқ улар жойидан йўқолиб қолгани тўғрисида хабар берилганди. Шунингдек, 4 декабрь куни Калифорнияда ҳам янги монолит топилган — уни ҳам ким ўрнатгани номаълум.
Изоҳ (0)