Xiaomi kompaniyasi tushunmovchilikni keltirib chiqaradigan ikkita suratni e’lon qildi. Ularning birida qizil, ikkinchisida — ko‘k artefakt tasvirlangan, deb xabar beradi “Hi-Tech.Mail.ru”.
Suratlar Xiaomi India global vitse-prezidenti va boshqaruv direktori Manu Kumar Jaynning Twitter’dagi sahifasida e’lon qilingan. Aftidan, kompaniya bu orqali yangi Redmi qurilmalariga e’tiborni jalb etishga uringan ko‘rinadi.
Gap smartfon haqida ketayotganini aniq aytish mumkin — buni Manu Kumar Jayn o‘zining keyingi posti orqali tasdiqlagan. Shuningdek, u smartfon “o‘z turi orasida birinchi bo‘lib” noyob xarakteristikaga ega bo‘lishiga shama qilgan. U qurilmaning uzoq vaqt avtonomligini ta’minlab bera oladigan ulkan sig‘imli akkumulyatorni nazarda tutayotgan bo‘lishi mumkin.
Yangi smartfonga oid savollarga tez orada oydinlik kiritiladi: sirli yangi model taqdim etiladigan tadbir 16-dekabr kuni o‘tkazilishi kerak.
Noodatiy suratlar dunyoning turli nuqtalarida paydo bo‘lib va yo‘qolib qolayotgan monoliglarga o‘xshaydi. Eslatib o‘tamiz, 18-noyabr kuni AQShning Yuta shtatida hamda 26-noyabr kuni Ruminiya shimolida tashqi ko‘rinishi bilan Stenli Kubrikning “Fazoviy sayohatnoma” filmidagiga o‘xshash uchburchak monolitlar topilgani, keyinroq ular joyidan yo‘qolib qolgani to‘g‘risida xabar berilgandi. Shuningdek, 4-dekabr kuni Kaliforniyada ham yangi monolit topilgan — uni ham kim o‘rnatgani noma’lum.
Izoh (0)