Фарғонада йўл қоидасини бузган ИИБ ходими жаримага тортилди

Ижтимоий тармоқда «Фарғоналик окахонларимизга бўлаверадими?» сарлавҳаси остида хабар тарқалган. Ҳолат юзасидан ЙҲХББ маълумот берди.

Қайд этилишича, 2020 йилнинг 7 декабрь куни ижтимоий тармоқда «Фарғоналик окахонларимизга бўлаверадими?» сарлавҳаси остидаги хабар тарқалди.

Унда Фарғона вилояти ИИБ жамоат тартибини сақлаш бошқармасига тегишли бўлган, Nexia русумли 40 312 VSF давлат рақам белгили махсус хизмат автомобили йўл ҳаракати қоидаларининг 91-бандини бузган ҳолда 1.4 (Тўхташ тақиқланган жойни билдиради. Якка ҳолда ёки 3.27 Тўхташ тақиқланган йўл белгиси билан қўлланилади ҳамда йўлнинг қатнов қисми четига ёки йўл четидаги тўсиқ устидан чизилади) йўл ётиқ чизиғи чизилган жойда тўхтаб турганлиги акс этган.

Мазкур ҳолат ўрганилган ва давлат рақами 40 312 VSF бўлган Nexia махсус хизмат автомобили бириктирилган Фарғона вилояти ИИБ ЖТСБ ҳайдовчи ходимига нисбатан белгиланган тартибда чора кўрилган.

Аввалроқ Жиззах ва Тошкентда йўл қоидасини бузган ЙПХ ходимига чора кўрилгани ҳамда Сирдарё ЙҲХБга тегишли 4 ойда 15 марта қоида бузган автомобиль «кечиктириб бўлмайдиган хизмат вазифаларини бажарганлиги» сабаб жарималардан озод этилгани ҳақида хабар берилганди.