2021 йилдаги Жаҳон иқтисодий форуми режалаштирилганидек Швейцарияда эмас, балки 13—16 май кунлари Сингапурда ўтказилади. Бу ҳақда Жаҳон иқтисодий форумини бошқарувчи кенгаш президенти Берге Бренде маълум қилди, деб ёзмоқда «РБК».
Тадбирни 2021 йилнинг баҳорида Швейцарияда ўтказиш режалаштирилганди, бироқ COVID-19 сабабли Европадаги эпидемиологик вазият форумнинг иштирокчилари ва ходимлари учун барча эҳтиёт чораларига амал қилиш имконини бермайди.
Бренденинг қайд этишича, Сингапур эпидемия устидан ғалаба қозонишга муваффақ бўлган.
Форум анъанавий тарзда қишда ўтказилар эди, бироқ август ойида ташкилотчилар пандемия сабабли 2021 йилдаги тадбир ортга сурилишидан огоҳлантирган.
Давосдаги Жаҳон иқтисодий форумига 1971 йилда асос солинган. Унда дунёнинг турли мамлакатларидан минглаб йирик тадбиркорлар ва давлат мансабдорлари иштирок этади. 2020 йилда тадбир 117 та мамлакатдан келган уч минг кишини, шу жумладан 53 нафар давлат ва ҳукумат раҳбарини қабул қилди.
2002 йилда Жаҳон иқтисодий форуми биринчи марта Европадан ташқарида бўлиб ўтган. У АҚШдаги 11 сентябрь теракти сабабли бирдамлик рамзи сифатида Нью-Йоркда ташкил қилинган.
Жонс Ҳопкинс университети маълумотларига кўра, пандемия бошидан буён Сингапурда коронавирус билан касалланиш бўйича 58,2 мингта ҳолат қайд этилган, 29 киши касаллик оқибатида вафот этган, бунда мамлакат аҳолиси 5,6 миллион кишини ташкил этади. Касалликнинг энг юқори чўққиси апрель ойида қайд этилган. Касаллик тарқалишининг яна бир кучайиши июль—август ойларида кузатилган, шундан буён касалланиш ҳолатлари сони камаймоқда.
Изоҳ (0)