Беларусь мухолифати раҳбари Светлана Тихановская Александр Лукашенко ҳокимиятдан бош тортган тақдирда, 45 кунлик ўтиш давридан сўнг мамлакатни бошқариш ниятида. Бу ҳақда унинг 7 декабрь куни “Tut.by”га берган интервьюсига таяниб, «Korrespondent.net» хабар қилди.
«Мен буни сайловолди ташвиқот давомида айтдим – биз янги сайловлар ўтказишимиз керак. Энди буни онгли равишда амалга оширишга имкон берадиган ҳужжатлар ишлаб чиқилгани сабабли, биз бундай баёнотни ёзишга қарор қилдик.
Аммо шунга қарамай, мен барча сиёсий маҳбуслар озод қилинмагунча буларнинг ҳаммасидан воз кечмаслигим аниқ», – деди Тихановская.
Тихановскаянинг халқаро ишлар бўйича маслаҳатчиси Франк Вячорка янги сайловларни ўтказиш учун энг камида 45 кун талаб қилинади, деб таъкидламоқда.
«Бизнинг вазифамиз – янги сайловларни тезроқ ташкил қилиб, унинг нормал ўтиши ва барчанинг рақобатлашиши учун бир хил шароит яратиш», – деди Вячорка.
Тихановскаянинг сўзларига кўра, яқин кунларда Лукашенко кетганидан кейин амалга ошириладиган конституциявий ислоҳот лойиҳаси, шунингдек, аҳолининг ижтимоий ҳимояга муҳтож қатламларига иқтисодий ёрдам кўрсатиш ва кичик ҳамда ўрта бизнесни қўллаб-қувватлаш дастури эълон қилинади.
Мухолифат раҳбари, шунингдек, ҳокимиятни топшириш бўйича музокаралар муқаррарлигини айтди.
«Ҳамма нарса музокаралардан бошланади, биз уларни ўтказишимиз керак. Воқеалар ривожи қандай бўлишидан қатъи назар, у (Лукашенко) музокара столига ўтиради.
Келишувга эришилганда сиёсий маҳбуслар озод этилгач ўтиш даври бошланади ва янги сайловлар бўлиб ўтади», – деди Тихановская.
Шу билан бирга, унинг таъкидлашича, келишув шартлари музокараларга, ушбу музокара столида кимлар бўлишига, шунингдек, ўша пайтда Александр Лукашенко қаерда бўлишига боғлиқ.
Аввалроқ Лукашенко ўзини Беларусь ҳукуматидан узоқлаштириш йўлини ошкор қилиб, бу ишни фақат Беларусь халқи қилиши мумкинлиги ҳақида айтган эди.
Беларусда 2020 йил 9 августдан буён президентлик сайловларидан кейин бошланган норозилик намойишлари давом этмоқда. Беларусь МСК Лукашенкони сайловлар ғолиби деб топган, асосий рақобатчи, мухолифат вакили Светлана Тихановская эса расмий маълумотларга кўра 10 фоиз овоз олган. Тихановскаяни Европа давлатлари қўллаб-қувватламоқда. Тихановская мағлубиятини тан олмаган ва ўзини «Беларусь халқи томонидан сайланган ягона етакчи» деб атаган. Сайловдан икки кун ўтгач Тихановская Литвага чиқиб кетган. Унинг сафдошлари Тихановская ҳукумат босими остида мамлакатдан чиқиб кетганини маълум қилган. Лукашенко бир неча марта сайловлар ҳалол ўтгани ҳақида гапирган, Москва ҳам унинг президентликка сайланганини тан олган.
Лукашенкога қаршилар ҳанузгача кўчаларга чиқиб ўз норозилигини билдирмоқда. 22 ноябрнинг ўзида Минскдаги митинглар вақтида сайловлардаги натижаларни бекор қилиш ва қайтадан ўтказишни талаб қилаётганлар орасидан 300 дан зиёд киши ҳибсга олинган. Инсон ҳуқуқлари ҳимоячилари ҳибсга олинганларнинг бир қисми тез ёрдам машиналарида олиб кетилганини қайд этган.
Ноябрь ўрталарида Минскдаги фаоллардан бири Роман Бондаренконинг ҳалок бўлгани хабар қилинган. У ўз уйи ёнида, ҳовлида ниқоб таққан фуқаролик кийимидаги нотаниш нусхалар томонидан калтакланган ва кейинчалик шифохонада вафот этган. Бош прокуратура содир бўлган воқеа ҳақида гапирган тез ёрдам ходимининг маълумотлари ишончли эмаслигини билдирган.
Лукашенко президентлик ваколатларининг 70-80 фоизини Парламент, ҳукумат ва бошқа тузилмаларга беришни ваъда қилган.
«Ҳукумат ушбу масалаларни ҳар томонлама ўрганиб чиқмоқда, яъни ИИВ, ДХҚ, губернаторлар, маҳаллий ҳокимлик органлари буни муҳокама қилиб, Парламентда ҳам дебатлар қилинг, қонун доирасида қарор чиқариб, қонунни президент имзоси учун киритинг», — деганди Лукашенко.
Изоҳ (0)