2021-yildagi Jahon iqtisodiy forumi rejalashtirilganidek Shveysariyada emas, balki 13—16-may kunlari Singapurda o‘tkaziladi. Bu haqda Jahon iqtisodiy forumini boshqaruvchi kengash prezidenti Berge Brende ma’lum qildi, deb yozmoqda “RBK”.
Tadbirni 2021-yilning bahorida Shveysariyada o‘tkazish rejalashtirilgandi, biroq COVID-19 sababli Yevropadagi epidemiologik vaziyat forumning ishtirokchilari va xodimlari uchun barcha ehtiyot choralariga amal qilish imkonini bermaydi.
Brendening qayd etishicha, Singapur epidemiya ustidan g‘alaba qozonishga muvaffaq bo‘lgan.
Forum an’anaviy tarzda qishda o‘tkazilar edi, biroq avgust oyida tashkilotchilar pandemiya sababli 2021-yildagi tadbir ortga surilishidan ogohlantirgan.
Davosdagi Jahon iqtisodiy forumiga 1971-yilda asos solingan. Unda dunyoning turli mamlakatlaridan minglab yirik tadbirkorlar va davlat mansabdorlari ishtirok etadi. 2020-yilda tadbir 117 ta mamlakatdan kelgan uch ming kishini, shu jumladan 53 nafar davlat va hukumat rahbarini qabul qildi.
2002-yilda Jahon iqtisodiy forumi birinchi marta Yevropadan tashqarida bo‘lib o‘tgan. U AQShdagi 11-sentabr terakti sababli birdamlik ramzi sifatida Nyu-Yorkda tashkil qilingan.
Jons Hopkins universiteti ma’lumotlariga ko‘ra, pandemiya boshidan buyon Singapurda koronavirus bilan kasallanish bo‘yicha 58,2 mingta holat qayd etilgan, 29 kishi kasallik oqibatida vafot etgan, bunda mamlakat aholisi 5,6 million kishini tashkil etadi. Kasallikning eng yuqori cho‘qqisi aprel oyida qayd etilgan. Kasallik tarqalishining yana bir kuchayishi iyul—avgust oylarida kuzatilgan, shundan buyon kasallanish holatlari soni kamaymoqda.
Izoh (0)