Президент Шавкат Мирзиёевнинг назорати остида 8 декабрь, сешанба куни «Меҳр» операциясининг навбатдаги босқичи амалга оширилгани тўғрисида хабар берилганди. ЎзА Суриянинг жанговар ҳаракатлари олиб борилаётган ҳудудларидан ватанга қайтарилган ўзбекистонликларнинг суратлари билан бўлишди.
«Меҳр-3» инсонпарварлик операцияси ёрдамида Суриянинг жанговар ҳаракатлари олиб борилаётган ҳудудларидан 98 нафар ўзбекистонлик, яъни 25 нафар аёл ва 73 нафар бола ватанга қайтарилди.
Олиб келинганлар эндиликда барча қулайликларга эга бўлган соғломлаштириш муассасаларига жойлаштирилиб, иссиқ овқат ва кийим-кечак билан таъминланади. Мутахассислар томонидан тиббий ва психологик ёрдамлар кўрсатилади.
Мавзуга доир: Видео: Сурия жангоҳларидан қайтган аёл билан суҳбат
Маълумот учун, Ўзбекистон раҳбарияти «Меҳр» инсонпарварлик операциясини илк бор 2019 йил май ойи охирида амалга оширган, ўшанда 156 нафар ўзбекистонлик, асосан, аёллар ва болалар Uzbekistan Airways’нинг Сурия пойтахти Дамашқдан амалга оширилган махсус рейси билан Ўзбекистонга олиб келинган эди.
Кейинчалик ушбу операция давомида Ўзбекистон томони маълум бир қийинчиликларга дуч келгани аён бўлган эди. Хусусан, Ўзбекистон Президенти Шавкат Мирзиёев бир давлат Суриядан ватандошларни олиб қайтиш учун Ўзбекистон самолётини уриб тушириш билан таҳдид қилганини маълум қилган эди.
2019 йилнинг октябрь ойида эса Яқин Шарқдаги можаролар ҳудудидан ўзбекистонликларни қайтариш бўйича иккинчи махсус операция амалга оширилган.
Изоҳ (0)