Ўзбекистонда коронавирусга чалингани Соғлиқни сақлаш вазирлиги томонидан расман тан олинган беморларнинг соғайиш кўрсаткичи 97 фоизга етди. Бу ҳақда вазирлик матбуот хизмати хабар бермоқда.
Хабар беришларича, 2020 йил 15 мартдан 7 декабрга қадар Ўзбекистонда 74 206 кишида (хусусан, 7 декабрь куни 153 кишида) COVID-19 тасдиқланган. Шундан 71 482 нафари (хусусан, 7 декабрь куни 167 нафари) соғайган — бу коронавирусга чалингани ССВ томонидан тан олинган жами беморларнинг 97 фоизидир.
Қайд этиш жоиз, мамлакатда касалланиш кўлами сезиларли қисқаргани, бунинг натижасида коронавирусга чалинган беморларни даволашга мослаштирилган шифохоналар яна ўз йўналишига қайтарилгани, бир қатор ковид-марказлар эса ёпилганига қарамай, ССВнинг «соғайиш кўрсаткичи» 27 октябрдан бери 96 фоизлик кўрсаткичда ўзгармай келаётган эди.
Вазирликнинг 8 декабрь тонгидаги ахборотига кўра, айни вақтда Ўзбекистонда коронавирусга чалингани ССВ томонидан тан олинган 2113 нафар бемор даволанишни давом эттирмоқда; маълум қилишларича, улардан 179 нафарининг аҳволи оғир, 34 нафарининг аҳволи эса ўта оғир.
ССВ статистикаси бўйича, ҳозиргача 611 нафар бемор коронавирус инфекцияси асоратлари оқибатида вафот этган. «Дарё» интернет-нашри 22 сентябрга қадар юритган алоҳида статистика бўйича эса, қурбонлар сони камида 19 нафарга кўпроқ.
Изоҳ (0)