Ўзбекистонда 2020 йил 1 декабрь ҳолатига кўра беморлар билан ишлаган вақтида коронавирус юқтириб олиб, вафот этган тиббиёт ходимларининг фақат икки нафарига 250 миллион сўм миқдорида бир марталик тўлов тўлаб берилган. Бу ҳақда Молия вазирлигининг Республика бўйичакоронавирусга қарши кураш тадбирлари учун жалб қилинган ходимларга тўловларни тўланиши тўғрисидаги Маълумотномасида билдирилган.
Президентнинг 2020 йил 26 мартдаги қарори билан беморлар билан ишлаш вақтида коронавирусни юқтириб олган тиббиёт, санитария-эпидемиология хизмати ва бошқа ходимларга бир йўла бериладиган қўшимча тўловлар миқдорлари белгиланган эди. Унга кўра, коронавирусни юқтириб олганларга 100 миллион сўмдан, касалликни юқтириш оқибатида оғир аҳволга тушган ва соғлиғи тикланмаган тақдирда (вафот этса), унинг оила аъзоларига 250 миллион сўмдан тўланиши лозим эди.
Молия вазирлигидан «Дарё»га маълум қилишларича, 2020 йил 1 декабрь ҳолатига Инқирозга қарши куриш жамғармаси маблағлари ҳисобидан коронавирус инфекцияси тарқалишига қарши курашиш доирасида жами 70 нафар ходимга — уларнинг 10 нафари врач, 37 нафари ўрта тиббиёт ходими, 23 нафари кичик тиббиёт ходими — 10,031 миллиард сўм (ягона ижтимоий тўлов ва бошқа мажбурий ушланмалар билан бирга) тўлаб берилган.
Бунда:
- беморлар билан ишлаган вақтида коронавирус инфекцияси юқтириб олган тиббиёт, санитария-эпидемиология хизмати ва бошқа ходимлардан 69 нафарига 9,672 миллиард сўм;
- Тошкент шаҳрида коронавирус инфекциясини юқтириш натижасида вафот этган бир нафар ходимнинг оила аъзоларига 359 миллион сўм (мажбурий ушланмалар билан бирга) тўланган.
Қайд этиш жоиз, Президент Шавкат Мирзиёевнинг июль ва август ойларидаги фармонларига мувофиқ, коронавирус пандемиясига қарши курашга жалб этилган жами саккиз нафар тиббиёт ходими вафотидан сўнг «Жасорат» медали билан тақдирланган эди. Улардан бири — яккасаройлик шифокор Алишер Ураловнинг оила аъзоларига унинг қизи ОАВ орқали чиқиш қилгач, 250 миллион сўмлик бир марталик тўлов ўтказиб берилгани июль ойида маълум қилинган.
30 июль куни Соғлиқни сақлаш вазирлиги ҳузуридаги коронавирусга қарши кураш бўйича штаб аъзоси Ҳабибулла Оқилов «ўтган ҳафтадаги маълумотлар бўйича» мамлакат бўйича 540 нафардан ортиқ тиббиёт ходими коронавирусга чалинганини маълум қилган эди. Кейинчалик уларнинг сони қанчалик кўпайгани номаълум. Октябрь ойида Қашқадарё ҳокимлиги вилоятда пандемия даврида 27 нафар тиббиёт ходими вафот этганини билдирган эди.
Молия вазирлиги матбуот хизматидан «Дарё»га маълум қилишларича, вазирлик 100—250 миллион сўмлик тўловларни амалга ошириш бўйича тегишли вазирлик ва идоралардан талабномалар келиб тушиши билан ҳар доим тўловларни ўз вақтида ўтказиб келган, бу борада қондирилмай қолган бирор талабнома йўқ. Коронавирусга чалинган тиббиёт ходимлари (масалан, июль ойи охирида тахминан 540 нафарни ташкил этган) ва бир марталик ёрдам пулини олганлар (1 декабрь ҳолатига кўра 69 нафар) сонидаги фарқ юзасидан эса Соғлиқни сақлаш вазирлигидан изоҳ олиш тавсия қилинди.
Изоҳ (0)