Қозоғистонда коронавирусга қарши оммавий вакцинацияни 2021 йилдан бошлаш режалаштирилмоқда. Бу ҳақда мамлакат президенти Қосим Жўмарт-Тўқаевга бош вазир Асқар Мамин маълум қилди, деб хабар беради Tengrinews.
Мамлакат раҳбарига 2020 йилнинг декбар ойида 2 миллион доза ҳажмида маҳаллий вакцинанинг биринчи партиясини ишлаб чиқариш бошланиши тўғрисида маълумот берилган.
«Шунингдек, Қозоғистон президенти Россия президенти Владимир Путин билан келишувига кўра, 22 декабрдан мамлакатда ‘Спутник V’ вакцинасини ишлаб чиқариш бошланишини маълум қилган. Аҳолининг кўнгилли қисмини оммавий вакцинациядан ўтказиш 2021 йилдан бошланади. Биринчи босқичда аҳолининг заиф қатлами, жумладан, шифокорлар, ўқитувчилар, куч тузилмалари ходимлари қамраб олинади», — дейилади хабарда.
Бундан ташқари, Қозоғистон бош вазири Асқар Мамин коронавирусга қарши маҳаллий вакцинанинг яратилиш жараёни тўғрисида мамлакат президентига маълумот берган.
Ҳукумат раҳбарининг сўзларига кўра, 29 ноябрь куни клиник синовларнинг биринчи ва иккинчи фазаси якунланган. Маминнинг айтишича, салбий ҳолатлар кузатилмаган, вакцина юқори самарадорликни кўрсатган.
Қосим-Жўмарт Тўқаев вакцинани ишлаб чиқариш бўйича вазифани тезкор бажаргани учун Асқар Маминга миннатдорчилик билдирган ва маҳаллий вакцинанинг самарадорлигини таъминлаш бўйича назоратнинг зарурлигини таъкидлаган.
Эслатиб ўтамиз, қозоғистонлик олимлар коронавирусга қарши вакцина ишлаб чиқишни бошлагани ҳақида март ойи охирларида маълум бўлганди. 1 август куни Қозоғистон миллий аграр университетидаги Халқаро вакцинация марказида мамлакатда коронавирус инфекциясига қарши биринчи эмлаш ўтказилди. Август ўрталарида эса коронавирусга қарши вакцина яратган тадқиқотчи уни ўзида синаб кўрганди.
Аввалроқ Россия томонидан яратилган коронавирусга қарши «Спутник V» вакцинаси Ўзбекистонга олиб келингани маълум бўлганди.
Изоҳ (0)