Бутун дунёда коронавирус инфекциясидан 1,5 миллиондан зиёд киши вафот этди. Бу ҳақда COVID-19’га оид статистикани реал вақт режимида кузатиб борувчи Американинг Жонс Ҳопкинс университети маълумотлари гувоҳлик бермоқда, деб ёзади «РБК».
Ўлим ҳолатлари сони бўйича биринчи ўринни АҚШ эгалламоқда, у ерда коронавирусдан вафот этганлар сони 275,2 минг кишидан ошган. Иккинчи ўринда Бразилия (174,5 минг), учинчи ўринда — Ҳиндистон (138,6 минг). Кейинги ўринларни Мексика (107,5 минг), Буюк Британия (60,2 минг) ва Италия (58 минг) банд қилди.
Бутун дунё бўйлаб коронавирусни юқтириб олганлар сони, университет маълумотлари бўйича, 65 миллион кишидан ошди. Қайд этилган ҳолатлар бўйича АҚШ, Ҳиндистон ва Бразилия етакчилик қилмоқда. Тўртинчи ўринда — Россия (тезкор штабга кўра, 2,3 миллион бемор). Жаҳон соғлиқни сақлаш ташкилоти маълумотларига қараганда, 4 декабрь ҳолати бўйича дунёда 63,9 миллион киши касалликни юқтирган.
Эслатиб ўтамиз, Россияда биринчи марта сутка давомида 28 мингдан ортиқ кишида коронавирус аниқланди. Бу касалланганлар сони суткалик ўсиши бўйича пандемия давридан буён юқори кўрсаткич. Касалланганларнинг умумий сони 2 375 546 нафарга етди.
Аввалроқ хитойлик олимлар COVID-19’ни уйда юқтириб олиш хавфи транспортдагидан юқорироқ эканлигини аниқлаган эди. Коронавирусни юқтириб олиш хавфи битта жойда яшайдиган оилада энг юқорилиги маълум бўлди. Бунга, эҳтимол, ўз-ўзини яккалаш чоғида улар бир-бири билан кўпроқ мулоқот қилиши сабаб бўлган, деган фикрда олимлар.
Изоҳ (0)