Қамчиқ довонида пропан ортилган 24 тонналик цистернани олиб кетаётган MAN юк машинаси ағдарилиб кетди, дея хабар бермоқда Фавқулодда вазиятлар вазирлиги.
Қайд этилишича, ҳодиса 4 декабрь куни эрта тонгда Тошкент–Ўш халқаро автомобиль йўлининг 196-километрида содир бўлган.
Маълум қилинишича, MAN юк машинаси ҳайдовчиси Фарғонага пропан ортилган 24 тонналик цистернани олиб кетаётган вақтда бошқарувни йўқотиб, ён томонга ағдарилиб кетган.
Ҳолат юзасидан воқеа жойига 10 дақиқа ичида Фавқулодда вазиятлар вазирлигининг «Қамчиқ» махсус қидирув, ёнғин-қутқарув бошқармасининг қутқарув гуруҳлари етиб келган.
Юк машинаси кабинасининг деформацияси туфайли ҳайдовчининг оёғи қисилиб қолган бўлиб, қутқарувчилар бир неча сонияда махсус қутқарув анжомлари ёрдамида ҳайдовчини хавфсиз қутқариб олган ва касалхонага етказган. Ҳозирда ҳайдовчи ўзини яхши ҳис қилмоқда.
Шундан сўнг ФВВ ва Йўл ҳаракати хавфсизлиги хизмати ходимлари ҳамкорлигида юк машинаси хизмат кўрсатиш станциясига эвакуация қилинган.
https://youtu.be/cFwdjgVutOM
Аввалроқ Самарқандда ичида 20 нафар йўловчи бўлган автобус асфальтнинг сирпанчиқлиги оқибатида ағдарилиб кетгани, Навоийда 19 ёшли ҳайдовчи бошқарувидаги Nexia ағдарилиб кетиши оқибатида бир киши ҳалок бўлгани ҳамда Гулистонда ЙҲХБнинг Mercedes машинаси «Нива»га урилиб, уни ағдариб юборгани ҳақида хабар берилганди.
Изоҳ (0)