АҚШ Қримнинг Россияга қўшилганлигини ҳеч қачон тан олмайди. Бу ҳақда АҚШ давлат котиби ўринбосари Стивен Биган Европада хавфсизлик ва ҳамкорлик ташкилоти (ЕХҲТ)нинг вазирлар онлайн-учрашувида маълум қилди, деб ёзади «РБК».
«Россия Қримни босиб олганини биз ҳеч қачон тан олмаймиз», — дея ваъда берди Биган.
Унинг сўзларига кўра, Россиянинг Украина шарқидаги ва Қримдаги хатти-ҳаракатлари «ЕХҲТ минтақасида суверенитет ва ҳудудий дахлсизликнинг энг қўпол бузилиши» бўлиб қолмоқда.
Шунингдек, давлат котиби ўринбосари таъкидлашича, Россия қўшинлари Молдова ва Грузияда «ушбу мамлакатларнинг розилигисиз» бўлиб турибди. Россиянинг ўзида, унинг фикрича, инсон ҳуқуқлари ва матбуот эркинлиги бузилмоқда.
Ноябрда Россия президенти Владимир Путин Россия ва АҚШ ҳамкорлиги ҳақида гапираётиб, бузилган алоқаларни яна бузиб бўлмаслигини айтган эди. Давлат раҳбарининг матбуот котиби Дмитрий Песков ёзда Москва ва Вашингтон муносабатлари «қарийб энг пастки нуқтада» турганини айтганди.
Қрим 2014 йилда референдум натижаларига кўра Россияга қўшилган эди, унда овоз берганларнинг 95 фоизи республиканинг Россияга қўшилишини қўллаб-қувватлаган эди. Украина, АҚШ ва Евроиттифоқ мамлакатлари референдум натижаларини тан олмади. Кремль эса ярим оролнинг ҳудудий мансублиги масаласи Москва учун ёпиқ эканлигини бир неча марта маълум қилган.
Изоҳ (0)