Эдвард Сноуден Америка паспортини сақлаган ҳолда Россия фуқаролигини олишга қарор қилди

АҚШ Марказий разведка бошқармасининг собиқ ходими Эдвард Сноуден Америка паспортини сақлаган ҳолда Россия фуқаролигини олишни режалаштирмоқда. Бу ҳақда унинг адвокати Анатолий Кучерена маълум қилди, деб ёзмоқда «Интерфакс».

Адвокатнинг айтишича, Сноуден АҚШ паспортини сақлаб қолган ҳолда Россия фуқаролигини олишга қарор қилган, Россия қонунчилиги эса бунга имкон беради.

Кучеренанинг билдиришича, Эдвард Сноуден ҳафта охиригача Россиянинг тегишли органларига топшириш учун барча зарур ҳужжатларни тўплаши керак. «Мен унга барча зарур ҳужжатлар рўйхатини жўнатдим. Ўйлайманки, ҳафта охиригача у барча ҳужжатларни тўплайди ва биз фуқароликни олиш ҳақида ариза берамиз», — дея қўшимча қилган адвокат.

Адвокатнинг қайд этишича, америкалик собиқ агентнинг Россия фуқаролигини олиши йўлида тўсиқ кўрмаяпти. «Эдвард Россияда беш йилдан ортиқ яшади, унда муддатсиз доимий яшаш ҳуқуқи бор», — дея тушунтириш берган Кучерена.

Адвокатнинг сўзларига кўра, Россия фуқаролигини олиш учун зарур бўлган рус тилини билиш даражаси бўйича Сноуденда муаммо йўқ.

Эдвард Сноуден 2020 йилнинг октябрь ойида Россияда муддатсиз доимий яшаш ҳуқуқини олганди ва Россия фуқаролигини олиш ҳақида ўйлаётганди, чунки у рафиқаси билан яқинда фарзандли бўлади ва уларнинг фарзанди туғилиши билан Россия фуқаролигини олади.

Эслатиб ўтамиз, Эдвард Сноуден 2013 йилда оммавий ахборот воситаларига АҚШ махсус хизматларининг бутун дунёни кузатувчи дастурлари ҳақида маълумот тақдим этган. АҚШда Сноуденга нисбатан сиртдан жосуслик ва давлат мулкини ўғирлаш айбловлари эълон қилинган.

Сноуден дастлаб АҚШдан Гонконгга, кейин эса Россияга қочиб кетган. Шундан буён у Россияда вақти-вақти билан яшаш ҳуқуқини узайтириб яшаб келаётганди.