Россияда 1 декабрь соат 11:00 ҳолатига кўра яна 26 402 кишида коронавирус аниқланди, деб хабар бермоқда Meduza COVID-19’га қарши тезкор штабга таяниб. Бу бир кун аввалги кўрсаткичдан 64 кишига кўп. Мамлакатда касалланганларнинг умумий сони 2 322 056 нафарга етди.
Фото: «ТАСС»
Янги аниқланган касалланиш ҳолатларининг энг кўпи Москва (6524 та), Санкт-Петербург (3697 та) шаҳарларида ҳамда Москва (1104 та) ва Нижегородск (462 та) вилоятларида қайд этилган.
Сўнгги суткада коронавирусдан 569 та ўлим ҳолати қайд этилган (бундан бир кун аввал 368 киши вафот этганди). Бу Россияда суткалик ўлим ҳолати бўйича энг юқори кўрсаткич. Бундан аввалги рекорд 26 ноябрь куни қайд этилган, сутка давомида 524 киши вафот этганди.
Пандемия даври давомида эса COVID-19 беморларининг жами 40 468 нафари вафот этган.
Россияда умумий ҳисобда 1 803 467 киши, сўнгги суткада эса 24 763 киши коронавирусдан соғайган. Бир кун аввал 17 274 киши тузалганди.
«Роспотребнадзор» маълумотларига кўра, мамлакатда коронавирусни аниқлаш учун сўнгги 24 соатда 333 мингта тест ўтказилган. Бу 13 октябрдан буён энг кам кўрсаткич. Бир кун аввал, 30 ноябрь куни 474 та, 29 ноябрь куни 545 мингта, 28 ноябрь куни эса 987 мингта тест ўтказилганди. Тест олинишнинг нима учун камайгани ҳозирча номаълум.
Пандемия бошланганидан буён коронавирусни аниқлаш учун 76,7 миллионта тест ўтказилган.
Жонс Ҳопкинс маълумотларига кўра, Россия коронавирус қайд этилганлар сони бўйича дунёда АҚШ, Ҳиндистон, Бразилия ва Франциядан кейин бешинчи ўринда бормоқда. Айни пайтда коронавирусга чалинганлар сони дунёда 63 миллиондан ошган.
Аввалроқ Россияда коронавирус оқибатидаги ўлимлар бўйича ҳақиқий ҳолатни «Росстат» маълумотларидан билиб олиш мумкинлиги, лекин у ерда маълумотлар жуда кечикиб берилиши ва «Стопкоронавирус.рф» сайтида кўрсатилган ўлимлар сони билан тўғри келмаслиги, улар мамлакат бўйича ўртача 4—5 марта кўпроқлиги маълум қилинганди.
