Ўзбекистонда 2020 йилда 1 миллион 34 минг гектар майдонда ғўза парвариш қилиниб, 3 миллион 82 минг тонна пахта хом ашёси етиштирилди, дея хабар бермоқда Қишлоқ хўжалиги вазирлиги. Бу 2019 йилда етиштирилган ҳосилга нисбатан 9 фоизга кўп, бироқ белгиланган ялпи ҳосилга нисбатан 99,4 фоизни ташкил этади.
Пахта режасини бажариш кўрсаткичлари ҳудудлар кесимида қуйидагича кўриниш олган:
- Фарғона вилоятида — 107,7 фоиз;
- Хоразм вилоятида — 106,7 фоиз;
- Андижон вилоятида — 106,6 фоиз;
- Наманган вилоятида — 105,1 фоиз;
- Тошкент вилоятида — 104,4 фоиз;
- Самарқанд вилоятида — 103,6 фоиз;
- Қорақалпоғистонда — 102,7 фоиз;
- Навоий вилоятида — 102,7 фоиз;
- Жиззах вилоятида — 100,7 фоиз;
- Қашқадарё вилоятида — 95,8 фоиз;
- Сирдарё вилоятида — 93,5 фоиз;
- Бухоро вилоятида — 89,1 фоиз;
- Сурхондарё вилоятида — 82,3 фоиз.
Республикада ҳар гектар пахта майдонида ўртача ҳосилдорлик 29,8 центнерни ташкил қилган.
Шунингдек, 2020 йилда фаолият юритган 97 та пахта-тўқимачилик кластерлари томонидан 927 минг гектар майдондан 2 миллион 794 тонна ва 11 та кооперация томонидан 106,6 гектар майдондан 288 минг тонна пахта хом ашёси етиштирилган.
Эслатиб ўтамиз, Ўзбекистонда 2020 йилги пахта йиғим-терими мавсумида жойларда 2 570 дан ортиқ ташкилот, фермер хўжалиги ва кластерларда ўтказилган мониторинг натижасида меҳнат муносабатларига риоя қилиниши юзасидан 158 нафар мансабдор шахс маъмурий жавобгарликка тортилган.
Изоҳ (0)