Президент Шавкат Мирзиёев раислигида 30 ноябрь куни ҳудудларда жамоат транспортини ривожлантириш чора-тадбирлари муҳокама қилинди.
Президентнинг айтишича, 2020 йилнинг ўтган 10 ойи давомида Халқ қабулхоналарига жамоат транспорти масаласида 3 мингдан зиёд мурожаат тушгани вилоят, туман ва шаҳар ҳокимларининг мазкур соҳанинг ичига кирмаганини билдиради.
«Бирорта шаҳар ёки туманда транспорт соҳасининг сифатини яхшилаш бўйича тажриба йўқ, десак, тўғри бўлади. Ҳеч қайси вилоят ҳокими мана шу масала бўйича ўзининг чора-тадбирларини амалга оширмаган, қўшимча пул топиб, қўшимча автобус олиб, давлат-хусусий шерикчилик асосида бирор нарса қилмаган. Қилган бўлса ҳам, номига қилган. Ҳар бир туман бўйича бизда таҳлил бор. Бир ойда бир марта, бир чоракда бир марта бу масала туман ёки шаҳар сессиясида бу масалалар кўрилмаган. Бирорта вилоят ҳокимининг ўринбосари ўзининг соҳаси бўйича мукаммал билимга эга эмаслиги кўринди», — деди давлат раҳбари.
Шавкат Мирзиёев мутассаддиларга ҳар бир туман бўйича жамоат траснпортини ривожлантириш дастурини ишлаб чиқиш ва уларни халқ депутатлари кенгашларида тасдиқлатиш бўйича топшириқ берди. Шунингдек, мазкур дастурлар ижроси ҳар чоракда туман ёки шаҳар кенгашларида муҳокама қилиниши керак.
Президентнинг қайд этишича, ҳозирги замонавий логистикани, транспорт ҳаракатларини тушунадиган мутахассислар етишмайди. Давлат раҳбари автобус ҳайдовчиларини тайёрливчи марказ ташкил қилиш вазифасини қўйди.
Изоҳ (0)