Электр энергиясидан 10 миллион сўмдан зиёд қарзи бор истеъмолчилар сони маълум қилинди
Ўзбекистон аҳолисининг электр энергиясидан умумий қарздорлиги 2,4 триллион сўмдан зиёдни ташкил этмоқда. Бу ҳақда 24 ноябрь куни «Ҳудудий электр тармоқлари» АЖ томонидан ОАВ вакиллари учун ўтказилган матбуот анжуманида сўз юритилди, дея хабар бермоқда «Дарё» мухбири.
«Ҳудудий электр тармоқлари» АЖ бошқарув раисининг биринчи ўринбосари Жаҳонгир Обиджоновнинг айтишича, 573 минг 655 нафар истеъмолчи фойдаланган электр энергияси учун 1 йилдан ортиқ давр мобайнида умуман тўловларни амалга оширмаган. 3 йилдан буён қарзини тўламай келаётган қарздорлар эса 283 минг 489 нафардан иборат. Ҳозирги пайтда 3 йилдан бери тўлов қилмай келаётган қарздорлар Самарқанд вилоятида 46 минг 158 нафарни, Тошкент вилоятида 45 минг 685 нафарни, Фарғона вилоятида 28 минг 770 нафарни ва Андижон вилоятида 26 минг 867 нафарни ташкил қилмоқда.
«Қарздорлиги юқори бўлган истеъмолчиларни таҳлил қилганимизда, 1 миллион сўмдан 3 миллион сўмгача қарздорлар сони мамлакат бўйича 157 минг 839 нафар эканлиги маълум бўлди. 3 миллион сўмдан 5 миллион сўмгача бўлган қарздорлар салкам 15 минг нафар, 10 миллион сўмдан юқори миқдорда қарзи бор истеъмолчилар 5 минг 199 нафарни ташкил этяпти. Аҳолининг электр энергиясидан жами қарздорлиги 2,4 триллион сўмдан зиёд», деди Обиджонов.
Унинг қўшимча қилишича, «Ҳудудий электр тармоқлари» жойларда модернизация ва реконструкция ишларини олиб боради ҳамда куз-қиш мавсумига тайёргарлик кўради. Шу боис эскирган узатиш тармоқлари, трансформатор пунктларидаги алмаштириш, таъмирлаш ишлари ундирилган маблағлар ҳисобидан амалга оширилади.
