«19 йил қамоқ жазосини ўтаб чиқдим, яшаш уйим ноқонуний тарзда сотиб юборилган». Тошкент шаҳрида сайёр қабул бўлиб ўтди

Фуқаролар мурожаатлари ва масалаларини жойига бориб, ижобий ҳал қилиш мақсадида 30 ноябрь куни Тошкент шаҳри Миробод туманида сайёр қабул бўлиб ўтди. Унда Ички ишлар вазирлиги, Тошкент шаҳар прокуратураси, Соғлиқни сақлаш вазирлиги, Адлия вазирлиги ва бошқа бир қатор ташкилот ва идора мутасаддилари мурожаатчилар масалаларини ўрганди.

Мурожаатларнинг аксарияти уй-жой қуриш учун ер ажратиш, моддий ёрдам, пенсия, болалар нафақаси, ишга жойлашиш, банк-молия, солиққа тортиш, табиий газ, электр энергияси, ичимлик суви таъминотидаги узилишлар, соғлиқни сақлаш, коммунал хўжалик, йўлларни таъмирлаш, таълим соҳасидаги муаммолар, тадбиркорликни ривожлантириш юзасидан бўлди.

«Мен 2001 йилда босқинчилик жинояти билан қамоқ жазосига ҳукм қилинганман. Шундан кейин 19 йил ўтиб қамоқдан чиқдим. Озодликка чиқсам, аввалги яшаш уйим ноқонуний тарзда сотиб юборилган. Бу бўйича Тошкент шаҳар Олмазор тумани прокуратурасига мурожаат қилдим ва уйимни қайтариб олдим. Энди ҳаётимни бошидан бошлаб қураман. Ҳалигача уйланмаганман, яқинда турмуш қуриб, бола-чақа кўришни хоҳлайман. Бу ерга мутасаддилардан иш сўраб келдим», — деди Тошкент шаҳар прокуратурасининг қабулига мурожаат қилиб келган фуқаро.

Сайёр қабулда ҳуқуқни муҳофаза қилувчи органлар билан биргаликда Соғлиқни сақлаш вазирлиги, Маҳалла ва оилани қўллаб-қувватлаш вазирлиги ва таълим тизими ташкилотлари каби идора раҳбарлари ҳам қатнашди.

Мурожаатларнинг аксарияти соғлиқни сақлаш тизими бўйича бўлди. Пандемия шароитида дори-дармон ҳамда бошқа тиббий техник воситаларга талаб ортгани сабабли сотиб олишга қурби етмайдиган айрим фуқаролар ёрдам сўраб мурожаат қилди.

Бундан ташқари, болалар уйида тарбияланган фуқаро К.В. ўз мурожаатида Тошкент шаҳар, Олмазор туманидаги хонадонларнинг биридан олди-сотди шарномасини қонунийлиги ҳамда унга доимий яшаши учун давлат томонидан хонадон ажратилишида амалий ёрдам сўради. Мазкур мурожаат туман прокуратураси томонидан ўрганиб чиқилиб, Олмазор тумани, Минор кўчасида жойлашган 2-сонли ётоқхонанинг 43-сонли хонадони ажратилди.

Судлов ҳайъати ташкил қилиниб, қабулда узоқ муддатдан бери чўзилиб келаётган суд ишлари бўйича мурожаат қилган фуқаролар  масалалари ўрганилди. Фуқароларга мурожаатнинг мазмуни бўйича керакли маслаҳатлар берилди.

Сайёр қабулда ташкилот раҳбарлари ва фуқаролар жойида ҳал этилмаган масалалар бўйича кейинги куни идора биносида ўрганиб чиқишга келишиб олди.