Ўзбекистондан Қозоғистонга биринчи бор eTIR процедураси бўйича юк жўнатилди
Қозоғистон ва Ўзбекистон ўртасида 20 ноябрь куни eTIR (electronic TIR) процедурасидан фойдаланган ҳолда биринчи юк ташиш ишлари амалга оширилди. Бу ҳақда Халқаро автомобиль транспорти иттифоқи (IRU)га таяниб, «Gazeta.uz» хабар берди.
Маиший электротехника воситалари ортилган юк машиналари Тошкентдан чиқиб, Қозоғистон чегарасини кесиб ўтган, иккала томоннинг божхона органлари эса транзит кафолатларини муваффақиятли қайта ишлаган.
Ушбу юкларни ташиш процедуралари IRU ва Германия халқаро ҳамкорлик жамияти (GIZ) раҳбарияти, шунингдек, IRU’нинг Ўзбекистон ва Қозоғистондаги божхона органлари ҳамда аъзолари — Ўзбекистон юк ташувларининг халқаро автомобиль ассоциацияси (AIRCUZ) ва Қозоғистон юк ташувларининг халқаро автомобиль иттифоқи (KazATO) томонидан қўллаб-қувватланган савдо жараёнларини соддалаштириш бўйича минтақавий лойиҳасининг муҳим тармоғига айланди.
TIR (Transports Internetional Routiers — Халқаро йўлларда ташиш) — 1975 йилда яратилган халқаро йўлларда ташиш китобчасини қўллаган ҳолда юкларни халқаро ташиш тўғрисидаги божхона конвенцияси асосида ишлайдиган юкларни халқаро йўлларда ташиш тизими. Айни вақтда ХЙТни тўлиқ рақамли процедурага ўтазиш ишлари амалга оширилмоқда.
«Автомобилларда юкларни ташишни соддалаштириш мақсадида рақамлаштириш, айниқса, денгизга чиқа олмайдиган Марказий Осиё давлатлари учун жуда муҳим, чунки у денгиз портлари ва жаҳон бозорларига чиқишни яхшилаш учун қуруқлик йўлларини ривожлантириш имконини беради», — дейилади IRU хабарида.
eTIR’нинг кўплаб процедуралари масофадан туриб бажарилади, унда Халқаро йўлларда ташиш ассоциациясининг маҳаллий офисларига бориш талаб этилмайди.
Мавзуга доир: «Хоргос»нинг Ўзбекистон—Қозоғистон чегарасидаги муқобили «Ғишткўприк» пости яқинида қурилади
