ЮНИСЕФ: Ўзбекистонда энг камбағал уй хўжаликларининг 52 фоизи ижтимоий ҳимоянинг миллий тизими томонидан ҳеч қандай ёрдам билан қамраб олинмаган

ЮНИСЕФнинг «2019/2020: Ўзбекистондаги болалар вазиятининг таҳлили» ҳисоботида мамлакатда болали оилалар аҳолининг энг камбағал қатламларига мансуб эканлиги қайд этилди.

Ҳисоботга кўра ўтказилган тадқиқотлар Ўзбекистонда камбағаллик даражаси болали оилалар орасида айниқса юқори эканини кўрсатган.

«9 ёшгача бўлган болаларнинг тахминан 30 фоизи ва 10 ёшдан 14 ёшгача бўлган болаларнинг 24 фоизи аҳолининг энг камбағал қатламларига мансуб оилаларда яшайди», – дейилган ҳисоботда.

ЮНИСЕФънинг баҳолаши бўйича 2018 йилда Ўзбекистон аҳолисининг 11,4 фоизи миллий камбағаллик даражасида яшаган. Аҳолини болалар нафақалари билан қамраб олиш даражаси пасаймоқда

Шунингдек, ҳисоботда Ўзбекистонда энг камбағал уй хўжаликларининг 52 фоизи ижтимоий ҳимоянинг миллий тизими томонидан ҳеч қандай ёрдам билан қамраб олинмагани таъкидланган.

ЮНИСЕФ ҳисоботида болалари бор оилаларни қўллаб-қувватлаш учун мўлжалланган болалар нафақаларининг учта тури билан қамраб олиш даражаси мунтазам пасайиб бораётганига ҳам урғу берилган.

«Масалан, 2 ёшгача бўлган болани парваришлаш учун нафақа олувчилар сони 2009 йилдан бошлаб 60 фоизга камайди. 2 ёшдан 14 ёшгача болалари бор оилаларга тўланадиган нафақалар вақт ўтиб қисқарди: эндиликда атиги 10 фоизгина болаларни қамраб олмоқда.

Ҳозирги вақтда 0–17 ёшдаги болаларнинг фақат 17 фоизи бола учун бирор турдаги нафақа (болани парваришлаш учун нафақа, оилавий нафақа ёки болалар ногиронлиги бўйича нафақа) оладиган уй хўжаликларида яшайди», – дейилган ҳисоботда.

«Ўзбекистонда ногиронлиги бор болаларнинг нафақа олиш ҳуқуқига эга бўлиши осон эмас. Бунинг учун улар ногиронликни белгилаш мураккаб жараёнидан ўтишлари керак, бу жараён эса маблағ сарфлашни талаб қилади. Шу сабабли ногиронлиги мавжуд болаларнинг қарийб ярми (48 фоизи) ана шу нафақани олмаяпти», — дейилади ЮНИСЕФ маълумотларида.

Таҳлилларга кўра, Ўзбекистонда болалар ногиронлиги бўйича нафақа тўлаш учун ажратилган бюджет паст даражада бўлиб, ЯИМнинг атиги 0,21 фоизини ташкил қилган.

Аввал ЮНИСЕФнинг Ўзбекистонда болалар ҳуқуқлари борасида эришилган ютуқлар пандемия сабаб йўққа чиқиши мумкинлиги ҳақида огоҳлантиргани хабар қилинганди.