Давлат хавфсизлик хизмати томонидан гиёҳванд моддалар савдосига қарши ўтказилган тадбирда 2 килограмм опий олиб кетаётган шахс ушланди. Бу ҳақда «Дарё»га ДХХдаги манбалари хабар берди.
Маълум қилинишича, Тошкент вилоятининг Бекобод шаҳрида яшовчи Э.Ж. Lada Largus русумли автомашинада келиб, Тошкент—Бекобод автомагистрал йўлидаги 91-йўл белгисининг таг қисмига яшириб кетилган опий гиёҳванд моддасини олиб кетаётган вақтида ДХХ Чегара қўшинлари ҳарбий хизматчилари томонидан ашёвий далиллар билан ушланган.
Гиёҳванд моддаси 2 дона ўрамда бўлиб, умумий оғирлиги 1 килограмм 908 грамм бўлган. Аниқланишича, ушбу гиёҳванд модда Тожикистондан айланма йўллар орқали Ўзбекистон ҳудудига олиб ўтилган.
Ҳозирда ҳолат юзасидан Жиноят кодексининг тегишли моддаларига асосан жиноят ишлари қўзғатилган. Тергов ҳаракатлари доирасида ушбу ишларга алоқадор бошқа шахсларни ҳам аниқлаш бўйича чора-тадбирлар кўрилмоқда.
Аввалроқ Тошкентдаги шерикларига гиёҳванд модда етказиб бериш учун йўлга чиққан самарқандлик фуқаро қўлга олингани, Урганчда 28 грамм опий гиёҳвандлик воситасини 12 миллион сўмга сотган 50 ёшли аёл қамоққа олингани, Наманганда ЙПХ постидан ярим килога яқин гашиш гиёҳванд моддасини олиб ўтмоқчи бўлган шахс ушлангани хабар берилган эди.
Изоҳ (0)