Ford GT суперкари дизайнининг муаллифи Морей Келлум ўзига тегишли автомобилни Скоц Велли шаҳрида сотувга қўйди, деб хабар беради Motor.
Фото: Canepa
Ford компанияси GT моделини харид қилиш жараёнини максимал даражада мураккаблаштирган — моделни шунчаки дилернинг олдига бориб, 500 минг доллар тўлаб, олиб кетиш мумкин эмас. Суперкарнинг барча потенциал харидорлари марка раҳбарияти билан бир неча босқичдан иборат суҳбатлардан ўтиши лозим. Шунингдек, Ford чайқовчиликнинг олдини олиш мақсадида модель эгалари билан махсус битим имзолаган бўлиб, унга кўра, автомобиль харид қилинганидан бошлаб икки йил давомида уни сотиш мумкин эмас. GT жами 1350 нусхада яратилган бўлиб, уларнинг барчаси аллақачон сотиб бўлинган. Эндиликда иккиламчи бозорда илк суперкарлар пайдо бўлмоқда.
Улар орасида энг диққатга сазовори — 2017 йилда яратилган Liquid Red Metallic қизил рангига бўялган суперкар ҳисобланади: у иккинчи авлод моделининг ташқи кўринишини яратган инсонга тегишли. Ford GT бош дизайнери ўз ижод намунасини сотувга қўйган, бироқ Морей Келлум буни нима сабабдан амалга оширгани номаълум. Автомобиль ажойиб ҳолатда сақланган бўлиб, ҳозирга қадар 328 километр йўл босган. Дизайнер сотувга қўйилган модель нархини фақат харидорларга маълум қилишга тайёр.
Аввалроқ «60 сония ичида олиб қочиш» фильмидаги «Элеонор» Ford Mustang’и ўзига янги хўжайин қидираётгани тўғрисида хабар берилганди.
